07.09.1990/ Kushtetuta e Kaçanikut, themel i pavarësisë së Kosovës
Sot mbushen 28 vjet nga miratimi i Kushtetutës së Kaçanikut. Më 7 shtator të vitit 1990 deputetët e atëhershëm të Kuvendit të Kosovës miratuan Kushtetutën e Republikës së Kosovës, e cila erdhi si rezultat i shpalljes se Deklaratës së Pavarësisë më 2 korrik të po atij viti. Bashkë me referendumin për pavarësi, këto dy akte i vunë themelet e shtetit të pavarur të Kosovës.
Sot 28 vite më parë 111 delegatet shqiptarë miratuan Kushtetutën e Republikës së Kosovës e cila fuqizonte ligjërisht Deklaratën e Pavarësisë së 2 Korrikut. Nënkryetari i atëhershëm i Kuvendit , Ilaz Ramajli, rrëfeu për Radio Kosovën emocionet që kishte para 28 viteve, për deklaratën e cila vuri themelet e pavarësisë së Kosovës.
“Kanë kaluar 28 vite nga kjo kohë por, emocionet dhe kujtimet janë të fuqishme jo vetëm për mua por për të gjithë delegatet e Kuvendit të Kosovës që kanë marr pjesë në këtë mbledhje dhe besoj edhe bashkohanikëve tonë të cilët e kanë përjetuar atë kohë”ka thënë Ilaz Ramajli.
Shpallja e Kushtetutës së Kosovës është bërë në Kaçanik, në një organizim të mirë dhe të fshehtë, pasi vendi ishte i mbushur nga forcat policore dhe ushtarake të pushtuesit serb, qw kishte nisur një spastrim të hapur të institucioneve të Kosovës, duke i larguar punëtorët shqiptarë nga vendet e punës, tregoi Ramajli.
“Ka qenë një situatë shumë e vështirë në atë kohë në vend, janë pasuar më largimin e gjithë të punësuarve në administratën shtetërore të Kosovës, shqiptarët që kanë punuar aty janë larguar nga puna. Janë mbyll të gjitha mjetet e informimit në gjuhen shqipe” tha Ilaz Ramajli.
Ramajli duke folur për rëndësinë e Kushtetutës së Kaçanikut, tha se Kushtetuta e Kosovës e nxjerrë më 7 shtator 1990 dhe amendamentet e saja të nxjerra në vitin 1991 janë nxjerrë në një kontest tjetër kohor në krahasim me Kushtetutën aktuale që e ka Kosova. Mirëpo, sipas Ramajlit për kohën kur është nxjerrë Kushtetuta ka qenë njëra nga kushtetutat më të përparuara në rajon.
Pa dyshim kjo kushtetutë ka shprehur vullnetin e popullit të Kosovës, veçanërisht me amendamentet e vitit 1991 në të cilën është thënë se Kosova është shtet sovran dhe i pavarur. 7 Shtatori cilësohet si identitet i historisë së re të Kosovës dhe njëra nga datat më të çmuara të Kosovës
