1.862 ankesa nga qytetarët, 62 padi dhe 31 policë të arrestuar

Kryeshefi ekzekutiv i Inspektoratit Policor të Kosovës, IPK, Kushtrim Hodaj në Komisionin për Çështje të Sigurisë dhe Mbrojtjes ka bërë të ditur se gjatë këtij viti kanë pranuar 1.862 ankesa nga qytetarët, janë ngritur 62 kallëzime penale dhe janë arrestuar 31 zyrtarë policorë.

“1862 ankesa i kemi pranuar deri më tani prej qytetarëve, është 30 për qind më shumë se vitin e kaluar. Janë ngritur 62 kallëzime penale. 78 punonjës policor janë pezulluar, ndërsa 31 zyrtarë policorë janë arrestuar,” tha Hodaj duke shtuar se numri më i madh i ankesave është për keqpërdorim të detyrës zyrtare, fajde, shkaktimi i lëndimeve trupore dhe dhuna në familje.

Sa i përket aksionit në Karaçevë një vit më parë, Hodaj tha se ishin arrestuar 15 zyrtarë policor.

“Tani jemi në një situatë ku Prokuroria ka ngritur 71 aktakuza. Për epilogun më tutje do të jetë një proces gjyqësor. Por është lajm i mirë që kemi aktakuzë,” u shpreh Kryeshefi ekzekutiv i Inspektoratit Policor të Kosovës, IPK, Kushtrim Hodaj.