1 vit pas tërmetit, Basha: Shumica e familjeve jetojnë në kushte të mjerueshme

Po bëhet 1 vit nga tërmeti i 26 nëntorit 2019 dhe ende shumë familje jetojnë në kushte të mjerueshme dhe në çadra, pa asnjë mbështetje nga qeveria, konstatoi Kryetari i Partisë Demokratike, Lulzim Basha, pas vizitës në familjet e dëmtuara nga tërmeti në Ishëm duke u zotuar se kjo do të marrë fund me 25 prill, lekët do i shkojnë shqiptarëve jo inceneratorëve e koncensioneve korruptive.

“Shtëpitë e shkatërruara nga tërmeti janë vlerësuar padrejtësisht, ndërsa për të tjera nuk ka ende asnjë masë për t’i rindërtuar. Sot, pashë në disa familje në Ishëm gjendjen e mjeruar të banorëve të zonave të dëmtuara nga tërmeti dhe të rënduar edhe më shumë nga pandemia,” tha Lulzim Basha në Gjuricaj pasi u ndal në banesën e rrënuar nga tërmeti i 26 nëntorit të familjes së Limon Filit.

“Edhe pse ka kaluar 1 vit, kjo familje jeton në një depo, pasi askush nuk i ka dhënë zgjidhje për shtëpinë. Ndonëse banesa është plotësisht jashtë funksionit dhe gati për t’u shembur, vlerësimi i vetëm për dëmet që i kanë dhënë, është se përfiton 250 mijë lekë të reja, duke mos i dhënë asnjë lloj ndihme, ndërkohë që kjo familje po e pret dimrin e dytë pa çati mbi kokë.”

Në Lalëz, familja e Agim Muharremit po jeton ende në çadër, pasi edhe pse banesa është kualifikuar për t’u rindërtuar, ende nuk ka nisur asnjë punë, me justifikimin se rruga deri tek banesa nuk është e mirë.

“E njëjta histori përsëritet edhe në shtëpinë e Kasem Gjetës në Shkafanë, ku shteti nuk ka sy as veshë të shohë e dëgjojë hallet e këtyre njerëzve. Në Kuraten, në familjen e Shpëtim Kurti, 8 pjesëtarët e familjes po hyjnë në dimrin e dytë në çadër, duke jetuar në një kontenier që ia kanë dhuruar privatisht, pasi në shtëpinë e shembur plotësisht as kanë nisur të hidhen themelet. E zonja e shtëpisë tha se ende nuk kanë asnjë zgjidhje dhe po jetojnë në kushte të vështira,” tha lideri i Opozitës së Bashkuar dhe përtej propagandës, qytetarët po mbushin një vit që jetojnë nëpër çadra, pa asnjë mbështetje dhe me kërcënimin e koronavirusit, ndërsa qeveria vazhdon që paratë e taksave të shqiptarëve t’i bashkëndajë me njerëz pranë saj, nëpërmjet tenderave e koncesioneve korruptive.

“Kjo situatë duhet dhe do të marrë fund. Shqiptarëve u duhet një qeveri, që prioritet ka qytetarët dhe jo inceneratorët e koncesionet korruptive,” tha Kryetari i Partisë Demokratike, Lulzim Basha, pas vizitës në Ishëm duke përfunduar:

“Qeveria e ardhshme do t’u sigurojë banorëve të zonave të dëmtuara nga tërmeti banesat që u takojnë, ndërsa nga ndihma që kanë dhënë vendet mike do të përfitojnë qytetarët në nevojë.”