10 vjet burg, dënimi i parë për dhunë seksuale gjatë luftës në Kosovë
Gjykata Themelore në Prishtinë ka dënuar me 10 vjet burg, ish-policin serb, Zoran Vukotiç për kryerjen e veprës penale të dhunës seksuale gjatë luftës në Kosovë.
Sipas një njoftimi së Gjykatës Themelore në Prishtinë, Zoran Vukotiç, si pjesëtar i forcave policore të njësisë rezervë të Ministrisë së Punëve të Brendshme të Serbisë, “kishte marrë pjesë në dëbimin e popullatës civile shqiptare, në kryerjen e dhunës fizike dhe psikike ndaj tyre si dhe me përdorimin e dhunës dhe veprimeve të tjera çnjerëzore, kishte kryer dhunim seksual ndaj gruas së nacionalitetit shqiptar”.
“Në datën 22 maj të vitit 1999, te varreza e Vushtrrisë, forcat ushtarake, policore dhe paramilitare serbe në mesin e të cilëve edhe i akuzuari kishin tubuar popullatën civile shqiptare që më parë ishin dëbuar nga vendbanimet e tyre, i kishin urdhëruar të ulen të tokë dhe për derisa ishin në atë pozitë, i akuzuari me një mjet- shkop të drurit, fillon t’i rrahë duke i goditur në kokë dhe pjesë të ndryshme të trupit dhe në bashkëkryerje me pjesëtarët e tjerë të njësitit të përmendur, i ndajnë meshkujt e rinj, i ngarkojnë me kamionë dhe i largojnë nga vendi në drejtim të panjohur, ndërsa gratë, fëmijët dhe pleqtë i detyrojnë të presin në kolonë para një shtëpie dykatëshe, kinse për t’i pajisur me kartela të identifikimit dhe me të ardhur rendi te e dëmtuara D.1 i akuzuari e kishte marrë me forcë duke e futur në një dhomë në katin e dytë të asaj shtëpie ku kishte edhe femra të tjera të zhveshura dhe të dhunuara nga disa polic, ku në prezencën e atyre femrave dhe policëve të tjerë i akuzuari e kishte përplasur të dëmtuarën për dysheme, me forcë ia kishte shqyer rrobat dhe kishte kryer aktin seksual – dhunimin”, thuhet në njoftim të Gjykatës Themelore.
Presidentja Vjosa Osmani duke mirëpritur dënimin e Vukotiçit e ka cilësuar si një përparim të rëndësishëm, pasi për herë të parë një polic serb është dënuar për përdhunim gjatë luftës në Kosovë.
“Por mos të harrojmë se drejtësia e vonuar është e drejtësisë e mohuar. Ne kemi nevojë për përgjegjësi dhe drejtësi për mijëra të tjera të grave kosovare që nuk e kanë marrë atë,” tha në reagimin e saj përmes rrjetit social Twitter, Presidentja e Kosovës, Vjosa Osmani.
Duke përshëndetur vendimit Qendra Kosovare për Rehabilitimin e të Mbijetuarve të Torturës, QKRMT, dënimi i Vukotiçit shënon një moment kthese dhe shprese”, jo vetëm për viktimën, që ka dëshmuar kundër Vukotiqit, por edhe për të mbijetuarit e tjerë që një ditë drejtësia do të vihet në vend”.
Prokuroria Speciale e Kosovës kishte ngritur aktakuzë kundër Vukotiçit në mars të vitit 2020.
Ndryshe, sipas të dhënave të prezantuara nga institucionet në Kosovë, gjatë luftës së fundit, janë rreth 20 mijë raste të dhunimeve seksuale nga pjesëtarë të forcave serbe. Ky është rasti i parë që dikush dënohet për një krim të tillë nga gjykatat e Kosovës.
