10 vjetori i vendimit GJND, Basha: Është koha për njohje reciproke Kosovë-Serbi!
Në 10 vjetorin e vendimit të Gjykatës Ndërkombëtare të Drejtësisë, GJND, e cila vlerësoi se me shpalljen e Pavarësisë së Kosovës nuk ishte shkelur e drejta ndërkombëtare, Kryetari i Partisë Demokratike, Lulzim Basha, duke kujtuar angazhimin e Shqipërisë në krah të Kosovës me diplomacinë e saj tha se bashk do të përballojmë çdo sfidë ndërsa konstaton se tashmë është koha për njohje reciproke mes Kosovës dhe Serbisë.
“10 vjet më parë GJND konfirmoi se shpallja e pavarësisë së Kosovës ishte në përputhje me të drejtën ndërkombëtare. Sot është koha për njohje reciproke mes Republikës së Kosovës dhe Republikës së Serbisë. Kjo i shërben qytetarëve të dy vendeve, paqes dhe stabilitetit të rajonit,” tha Lulzim Basha në reagimin e tij përmes rrjetit social Twitter i bindur se Shqipëria dhe Kosova së bashku, në krah të njëri-tjetrit, do të sigurojnë të ardhmen:
“Shqipëria në krah të Kosovës me diplomacinë e saj dhe në koordinim të plotë me partnerët tanë strategjikë ??&??, dha gjithçka për shpalljen e pavarësisë dhe njohjen ndërkombëtare të Kosovës. Së bashku, në krah të njëri-tjetrit, do të përballojmë çdo sfidë e sigurojmë të ardhmen.”
Ndryshe, më 22 korrik të vitit 2010, Gjykata Ndërkombëtare e Drejtësisë në Hagë, me 10 vota pro dhe 4 kundër, vlerësoi se shpallja e pavarsisë së Kosovës më 17 shkurt të 2008 nuk e ka shkelur të drejtën ndërkombëtare. Sipas gjykatës, nga të gjitha të dhënat, pavarësia e Kosovës nuk ka shkelur as rezolutën 1244 të KS OKB dhe as kornizën kushtetuese të UNMIK.
