100 dështimet e Edi Ramës, Basha: Lufta personale me Becchettin, do t’iu kushtojë shqiptarëve 110 mln euro
Në 100 dështimet e kryeministrit Edi Rama në 8 vite, Kryetari i Partisë Demokratike, Lulzim Basha, rendit edhe luftën personale të Ramës me pronarin e TV Agon, Francesco Becchetti, e cila do t’iu kushtojë shqiptarëve 110 mln euro ose 4.560 lekë çdo shqiptar.
“21 ditë deri më 25 prill. 100 dështimet e Ramës në 8 vite. Sa do t’u kushtojë shqiptarëve lufta personale e Edi Ramës me sipërmarrësin italian Francesco Becchetti?” shkruan Luzim Basha në reagimin e tij përmes rrjetit social Instagram, një ditë pas vendimit përfundimtar të Gjykatës së Arbitrazhit ICSID duke dhënë dhe përgjigjen e frikshme të dëmtimit të shtetit shqiptar:
“110 milionë euro për shkak të papërgjegjshmërisë së Edi Ramës, çdo shqiptar do të paguajë 4.560 lekë për mbylljen e televizionit ‘Agon’.”
Ndryshe, dje u bë e ditur se Shqipëria humbi përfundimisht gjyqin me sipërmarrësin italian Francesco Becchetti, lidhur me dëmshpërblimin e kërkuar nga ai për mbylljen e televizionit “Agon” në vitin 2015. Qendra Ndërkombëtare për Zgjidhjen e Mosmarrëveshjeve të Investimeve, ICSID, një Gjykatë Arbitrazhi, pjesë e Bankës Botërore, e dënoi Shqipërinë në Prill të vitit 2019 me 110 milion euro, duke gjykuar se mbyllja e televizionit ishte “motivuar politikisht”. Ky dënim përfaqëson dhe vlerën më të lartë me të cilën Shqipëria është dënuar nga një Gjykatë Arbitrazhi.
