“100 incidente të dyshimta në Evropë, sulme hibride të Rusisë”

Një diplomat i lartë evropian tha se 100 incidente të dyshimta në Evropë këtë vit, mund t’i atribuohen Rusisë. Duke folur përpara një takimi me kolegët e NATO-s në Bruksel, ministri i Jashtëm çek, Jan Lipavský, tha se Evropa duhet t’i dërgojë një sinjal të fortë Moskës se kjo nuk do të tolerohet.

Tema kryesore e takimit është lufta hibride ruse
“Këtë vit kishte 500 incidente të dyshimta në Evropë. Deri në 100 prej tyre mund të jenë sulme hibride ruse, spiunazhi, operacioneve të ndikimit,” tha Lipavský. Çështja e kërcënimeve hibride ruse ishte një nga temat kryesore gjatë takimit dyditor të NATO-s në Bruksel që përfundoi sot.

Sekretari i Përgjithshëm i NATO-s, Mark Rutte, tha se Rusia dhe Kina janë përpjekur të destabilizojnë vendet evropiane dhe të ndajnë shoqëritë evropiane përmes sabotazhit, sulmeve kibernetike dhe shantazheve të energjisë.

Rutte shtoi se NATO kishte rënë dakord për një sërë masash për të parandaluar “aktivitetet armiqësore dhe kibernetike të Rusisë, duke përfshirë shkëmbimin e përmirësuar të të dhënave sekrete, më shumë ushtrime, mbrojtje më të mirë të infrastrukturës kritike dhe mbrojtjen e përmirësuar kibernetike”.

Duke folur në Berlin, kancelari gjerman Olaf Scholz tha sot se vendi i tij po përballet me një kërcënim të madh sabotimi nga Rusia dhe Kina. Ai theksoi nevojën që vendi të përgatitet më mirë për sulme dhe të bëhet më rezistente, shkruan The Guardian.

Një mori incidentesh
Në vitet e fundit, vendet evropiane kanë qenë dëshmitarë të një sërë incidentesh, sulmeve kibernetike, zjarrvënieve, mjeteve ndezëse, sabotazheve madje dhe komploteve për vrasje. Qëllimi i këtyre veprimeve, besojnë zyrtarët e sigurisë, është të mbjellin kaos, të përkeqësojnë tensionet sociale midis aleatëve të Ukrainës dhe të ndërpresin furnizimet ushtarake në Kiev.

Shqetësimet në Evropë për sulmet e mundshme hibride ruse janë intensifikuar pasi Ukraina u autorizua të përdorë raketa me rreze të gjatë veprimi të SHBA-së dhe Britanisë në sulmet brenda Rusisë.

Rutte paralajmëroi në muajin nëntor se fushata e sulmeve hibride të Rusisë tregoi se Moska po e zhvendoste me shpejtësi vijën e frontit nga Ukraina në rajonin e Baltikut, Evropën Perëndimore dhe madje edhe në veriun e largët”.

Një seri sabotazhesh
Shërbimet sekrete evropiane po studiojnë një sërë operacionesh të dyshimta ruse.

Suedia po heton sabotimin e supozuar të dy kabllove nënujore në Detin Baltik ndërsa zyrtarët perëndimorë dyshojnë se anija ka prerë qëllimisht kabllot duke tërhequr spirancën përgjatë shtratit të detit për më shumë se 160 kilometra.

Mbretëria e Bashkuar po heton rastin e një rrjeti të sofistikuar spiunazhi që dyshohet se i ka transmetuar sekrete Rusisë për gati tre vjet, duke mbledhur të dhëna sekrete për objektivat në të gjithë Evropën. Policia po heton gjithashtu nëse spiunët e lidhur me Rusinë dërguan pajisje ndezëse, nëpërmjet kompanisë së dërgesave DHL, në të gjithë Evropën, në Birmingham dhe Leipzig në Gjermani.

Bindshëm kërcënimi më serioz ishte komploti për vrasjen e Drejtorit Ekzekutiv të kompanisë gjermane Rheinmetall, Armin Papperger, një nga kompanitë e shumta evropiane që ndihmon në furnizimin me armë të Ukrainës.

Reagimi i NATO-s
Drejtori i shërbimit kundërzbulimit gjerman, Bruno Kahl, tha se sabotimi rus në fund mund ta shtyjë NATO-n të shqyrtoj përdorimin e klauzolës së mbrojtjes reciproke të Nenit 5. Shtrirja e gjerë gjeografike dhe natyra e larmishme e kërcënimeve përbëjnë një sfidë të rëndësishme për Perëndimin për të mobilizuar burimet dhe për të kundërshtuar efektivisht agresionin rus.

Një ish-zyrtar i lartë i mbrojtjes tha se praktikisht është e pamundur të përballesh plotësisht me luftën e përshkallëzuar hibride të Moskës. Ish-zyrtari evropian, i cili para pak kohësh u largua nga posti i tij, tha se Perëndimi kishte nënvlerësuar për vite me radhë aktivitetet hibride të Rusisë, duke humbur kohë të çmuar për të shkëmbyer të dhëna sekrete dhe të rris kapacitetet mbrojtëse.

Disa vende tani janë të detyruara të mbështeten në agjencitë joqeveritare për të mbrojtur territoret e tyre. Holanda ka shpallur planet për të punësuar përkohësisht kompani private të transportit detar për të forcuar sigurinë në pjesën e saj të Detit të Veriut.

Kremlini e mori veten nga tronditja
Rritja e aktiviteteve ruse erdhi pasi aparati i spiunazhit të Kremlinit u rikuperua nga tronditja fillestare që mori me dëbimin nga Evropa të 450 agjentëve rusë të cilët ishin prezantuar si diplomatë, si përgjigje ndaj pushtimit të Ukrainës.

Pa rrjetin tradicional të spiunëve me bazë në ambasada, zyrtarët perëndimorë besojnë se Rusia është detyruar të përdorë metoda më të rrezikshme dhe më pak konvencionale, duke u mbështetur te kriminelët për të bërë punë të pista.