100 mijë teste të shpejta të antigenit, Manastirliu: Nisim të hënën nga Tirana!
Ministrja e Shëndetësisë, Ogerta Manastirliu, ka bërë të ditur sot se duke filluar nga e hëna do të nis përdorimi i testeve të shpejta të antigenit për evidentimin e rasteve pozitive me COVID-19. Fillimisht do të nisë nga Tirana, tha ajo ndërsa janë siguruar 100 mijë teste.
“Për sa i përket përfshirjes së shpejtë të antigenit, kemi siguruar në kontratën e parë 100 mijë teste të shpejta të antigenit që janë tashmë të disponueshme në vendin tonë. Testimi i shpejtë i antigenit do të nisë nga dita e hënë fillimisht në Tiranë.
Në fazën e parë, duke filluar nga dita e hënë fillon testi i shpejtë i antigenit që do jetë i disponueshëm ntë gjithë njësitë vendore të kujdesit shëndetësor. Janë struktura që kryejnë testin e tamponit. Nga 20 dhjetori do të jetë dhe në spitalet rajonale,” tha ministrja Manastirliu ndërsa foli për investimet në përballje me pandeminë.
“Një fond prej 8 mln eurosh është dedikuar për mbështetjen speciale për stafet tona në terren, spitalet dhe operatorët e kujdesit shëndetësor. Kemi dyfishuar kapacitetet me shtretër. Forcuam kapacitetet spitalore me pajisje mjekësore për përballimin e pandemisë jo vetëm në afatshkurtër por dhe përballje në vjeshtë-dimër.
Në fillim të kësaj epidemi numëroheshin rreth 200 respirator, sot kemi 483 respiratorë të dedikuar në funksion të mbështetjes së terapive intensive. Kemi marrë të gjitha masat në kohë për testimin e shpejtë të antigenit.Sot janë funksionalë 4 laboratorë publikë.”
Shefja e Departamentit të Sëmundjeve Infektive në ISHP, Silva Bino, ka sqaruar se testi i antigenit mund të kryhet vetëm në 5 ditët e para të sëmundjes.
“Deri tani kemi kryer identifikimin e rasteve nëpërmjet testit të PCR. Ky test është identifikues. Ka edhe test të shpejtë të antigenit. Testet antigene janë diagnostikuese. Nëse jemi brenda 5 ditëve të parave të sëmundjes, mund të kryhet ky test.
Nëse kemi një person që ka më shumë se 5 ditë që janë diagnostikuar, atëherë duhet test PCR. Po kryhen trajtime për sigurinë e testeve. Është test i aprovuar nga ndërkombëtarët.”
