100 % taksë produkteve serbe/ Vetëm rojet e BE nuk reaguan…

Pas vendimit të Qeverisë së Kosovës për vendosjen e taksës 100 për qind për mallrat e importuara nga Serbia dhe Bosnja, shqetësim të veçantë tregoi Brukseli zyrtar për produktet serbe, dhe 21 nëntori po mbyllet vetëm me mungesën e reagimit të rojeve të godinave të institucioneve të Bashkimit Evropian.

I veçantë ishte reagimi emocional i Përfaqësueses së Lartë të Bashkimit Evropian, Federica Mogherini, ndonëse nuk është prej atyre tregtarëve shqiptarë që u pasuruan me mallrat serbe pas luftës, ajo kërkoi nga Qeveria e Kosovës që menjëherë të hiqet taksa prej 100 për qind për mallrat e importuara nga Serbia dhe Bosnja.

“Vendimi i sotëm i Qeverisë së Kosovës për të rritur taksën ndaj mallrave të importuara nga Serbia dhe Bosnja për 100 për qind është shkelje e pastër e CEFTA-s dhe frymës së Marrëveshjes për Stabilizim-Asociim mes Bashkimit Evropian dhe Kosovës. Ajo përkeqëson situatën pas vendimit të parë prej 10 për qind javën e kaluar. Qeveria e Kosovës duhet menjëherë të anulojë këto vendime,” tha Mogherini.

Dhe, thuase jeton në një tjetër, Komisionieri për Zgjerim i Bashkimit Evropian, Johannes Hahn ka përshëndetur deklaratën e Përfaqësueses së Lartë të BE-së, Federica Mogherini, se taksa e Kosovës ndaj mallrave të importuara prej Serbisë është shkelje e CEFTA-s. Dhe jo vetëm kaq!

Sipas Hahn, kjo taksë shkel parimet e tregtisë së lirë në rajon.

Nuk është e qartë pse ky reagim kaq i vrullshëm për siç e quajn ata “shkelje të Marrëveshjes CEFTA-s”, kur këtë Marrëveshje Serbia e shkel që nga dita e parë që Kosova, përkatësisht UNMIK-u e ka firmosur, dhe tregtarët me pamundësinë e Qeverisë së Kosovës, këtë betejë përfundimisht e kanë quajtur të humbur.

Dhe jo vetëm CEFTA! Federica Mogherinit nuk reagon kur marrëveshjet të cilat ajo vetë i ka ndërmjetësuar mes Serbisë dhe Kosovës, Beogradi zyrtar i shkel çdo ditë.

Mogherini nuk shqetësohet edhe kur Aleksandar Vuçiç thotë hapur se do ta luftoj Kosovën në përpjekjen për tu anëtarësuar në UNESCO ndërkohë thirrë Presidentin e po kësaj Kosove në dialog me këtë kriminel serb për normalizimin e marrëdhënieve.

Mogherini nuk shqetësohet kur Aleksandar Vuçiç e çoi botën në këmbë për të penguar anëtarësimin e Kosovës në FIFA, gjë që nuk kishte lidhje as me politikë, as me OKB dhe as me shumë gjëra që i ngatërron vetëm Brukseli zyrtar.

Dhe në fund, një çëshjte tjetër që nuk ka lidhje as me politikë dhe as me OKB, dhe sërisht Serbia lëviz çdo gurë, madje e angazhon edhe vetë Rusinë për të ndaluar anëtarësimin e Kosovës në INTERPOL! Anëtarësim nga i cili përfiton edhe Serbia, nëse e konsideron veten shtet normal, ashtu si edhe mikja e Vuçiçit, Mogherini. Serbia ia arriti qëllimin, Kosova nuk u anëtarësua në INTERPOL dhe zëdhënësja e kësaj zonje që udhëheqë diplomacinë evropiane tha se nuk i intereson INTERPOL-i por dialogu.

Sot, këtij interesimi i shtohet edhe një çështje: Mogherinit së bashku me Kocijançiçin dhe BE-në, nuk i intereson INTERPOL-i, ama me taksën 100 për qind ndaj produkteve serbe, nuk kanë as oreks për ngrënë një çapë bukë nga mielli hungarez i Vojvodinës, tokë kjo që vazhdon të jetë e pushtuar nga Serbia.