11 Mars 1981/ Thaçi dhe Haradinaj: Filloi një epokë e re, vendimtare …

Duke kujtuar demonstratat e 11 Marsit të vitit 1981, Presidenti dhe Kryeministri i Kosovës, vlerësojnë se  këtë vit filloi një epokë e re, vendimtare në historinë e Kosovës.

“Pas demonstratave të vitit 1968, që shprehën hapur kërkesën për ngritjen e statusit të Kosovës në nivel të republikës, më 11 mars 1981 filloi një fazë e re historike. Demonstrata e filluar nga studentët e Universitetit të Kosovës u shndërruan në vullnet dhe kërkesë gjithë popullore për Republikën e Kosovës. Viti 1981 shënon kthesën përfundimtare të orientimit të kërkesave politike për avancimin e statusit politik të Kosovës, që pas përpjekjeve dhe sakrificave u kurorëzua me çlirimin dhe pavarësinë Kosovës,” thekson Presidenti I Kosovës, Hashim Thaçi.

Ndërsa Kryeministri i Kosovës, Ramush Haradinaj, kujton të gjithë ata që guxuan dh ei dolën zot këtij vendi. “Demonstrata e 11 marsit ‘81 shënon një epokë vendimtare në historinë më të re të Kosovës. Mijëra studentë zgjodhën rrugën e paqes për ta kundërshtuar shtypjen dhe pabarazinë. Në përvjetorin e demonstratave studentore, kujtojmë të gjithë ata që guxuan të kërkonin atë që iu takonte, të drejtën e tyre, dhe që i dolën zot këtij vendi, në rrugën drejt çlirimit.”