12 orë pas tërmetit të fuqishëm, lëkundjet e tokës dhe dëmet…

12 orë pasi një tërmet i fuqishëm me magnitudë 5.1 të shkallës Rihter goditi Shqipërinë, 10 km afër Burrelit dhe me thellësi 10 km, lëkundjet e tokës kanë vazhduar por jo me forcën që kishte në momentin e parë.

Madje sipas Qendrës Mesdhetare Sizmiologjike, EMSC, një termet aq i fuqishëm nuk raportohet për 12 orët e fundit që të ketë goditur ndonjë vend në botë.

EMSC raporton edhe për dy tërmete prej 3.2 ballësh ndërkohë sipas të dhënave nga Instituti i Gjeoshkencave, Energjisë, Ujit dhe Mjedisit gjatë natës kanë rënë të paktën 8 tërmete me magnitutë 2.4 ballë të shkallës Rihter.

Qytetarët ishin ende në panik dhe duke telefonuar të afërmit e tyre pas këtij tërmeti të fuqishëm kur në orën 18:40 sërish u dëgjuan lëkundjet ndonëse me intensitet më të vogël, 3.2 të shkallës Rihter . Epiqendra e tërmetit ishte 18 km në veri të Peshkopisë dhe me thellësi vetëm 2 km.

Dhe ishte ora 21:42 kur Qendra Mesdhetare Sizmiologjike regjistron tërmetin e radhës në Shqipëri. Epiqendra sërish ishte Burreli, vetëm 13 kilometra larg dhe me thellësi 2 km.

Dëmet dhe paniku

Për fat të mirë, me rastin e tërmetit të fuqishëm me magnitudë 5.1 ballë të shkallës Rihter i cili epiqendër kishte Burrelin, nuk kishte viktima. Zytarisht tashmë është raportuar edhe për dëmtime të shumta të shtëpive në gjithë qarkun e e Dibrës.

Emergjencat Civile raportojnë për 235 banesa të dëmtuara në të gjithë qarkun, ndërsa Bashkia e Matit raportohet se është më e prekur nga pasojat e lëkundjeve sizmike.

Në këtë zonë rezultojnë 90 shtëpi të dëmtuara me çarje të mureve dhe tavaneve, 35 prej të cilave kanë mbetur në qiell të hapur, për shkak se dëmtimet në banesat e tyre janë serioze.

Ekspertët e Emergjencave Civile, raportohet se janë në terren në ndihmë të përfaqësuesve të pushtetit lokal.