12 vite pas liberalizimit, PD: Edi Rama rrezikon rikthimin e vizave, shqiptarët të protestojnë

Pas kërkesës së Çekisë për vendosjen e regjimit të vizave për Shqipërinë pasi nuk ka arritur të sigurojë kufijtë për emigrantët e paligjshëm, ka reaguar Partia Demokratike përmes Zëdhënëses Floriana Garo, duke e konsideruar një praktikë që ka të bëjë fund e krye me trafiqe mafioze njerëzore të organizuara dhe pista të korrupsionit, dhe një tjetër arsye që shqiptarët të ngrihen në protesta.

“Kërkesa ka ardhur pas vonesave dhe mospajtimit absurd të qeverisë Rama për të mos njësuar kriteret e vizave për shtetasit e vendeve të treta me BE, çka u mundëson nacionaliteteve të ndryshme të përdorin Shqipërinë si portë hyrëse në vendet e Bashkimit Europian,” thekson Partia Demokratike duke e cilësuar qeverinë që e kthen mbrapsht orën e Shqipërisë si një rrezik kombëtar.

Ndryshe, Çekia si kryesuese e Bashkimit Europian ka kërkuar pezullimin e lëvizjes pa viza për Shqipërinë dhe Serbinë, pasi numri i madh i emigrantëve të paligjshëm po hyjnë në territorin e BE duke përdor territorin shqiptar dhe serb.

Deklaratë: 

Çekia, vendi që mban Presidencën e BE deri në fund të vitit, ka kërkuar që Shqipërisë bashkë me Serbinë, t’u kthehet regjimi i vizave. Domethënë që qytetarët shqiptarë të kërkojnë vizë për të lëvizur në Bashkimin Europan, siç bënin para vitit 2010, kur qeveria Berisha e Partisë Demokratike liberalizoi vizat.

Kërkesa ka ardhur pas vonesave dhe mospajtimit absurd të qeverisë Rama për të mos njësuar kriteret e vizave për shtetasit e vendeve të treta me BE, çka u mundëson nacionaliteteve të ndryshme të përdorin Shqipërinë si portë hyrëse në vendet e Bashkimit Europian.

Partia Demokratike e dënon me ashpërsi këtë praktikë, që ka të bëjë fund e krye me trafiqe mafioze njerëzore të organizuara dhe pista të korrupsionit.

Vendimi e fut Shqipërinë në hartën e vendeve problematike dhe i ekspozon qytetarët shqiptarë ndaj qëndrimeve jodashamirëse në aeroportet e Europës.

Politika e portave të shqyera, jo vetëm ushtron trysni mbi sistemin e emigracionit të Bashkimit Europian, por është një risk për sigurinë, si për Shqipërinë ashtu dhe për vendet e BE.

Partia Demokratike, si forca që liberalizoi vizat i kërkon BE të ushtrojë presion mbi qeverinë Rama që të bëhet menjëherë përputhja e kritereve për viza me Shqipërinë. Lëvizja e lirë është e një rëndësie të jashtëzakonshme, dhe është arritur pas një bllokimi thuajse 70 vjeçar të shqiptarëve.

Shqiptarëve u theksojmë se kjo është një tjetër arsye që të ngrihen në protesta. Një qeveri që e kthen mbrapsht orën e Shqipërisë është një rrezik kombëtar.