12 vjetori i Protestës së 10 Shkurtit, Babai i Arben Xheladinit kërkon drejtësi

Sot shënohet 12 vjetori i Protestës së 10 Shkurtit, në të cilën u vranë dy aktivistë të Lëvizjes Vetëvendosje, Arben Xheladini dhe Mon Balaj, si dhe mbetën të plagosur rreth 80 të tjerë.

Për nder të kësaj dite, tek varri i Arben Xheladinit bën homazhe familjar dhe aktivistë të Lëvizjes.

Shaban Xheladini, babai i të vrarit, bën thirrje ndaj Qeverisë që të gjejë ata që vranë dy nga aktivistët dhe që plagosën më shumë se 80 të tjerë në 10 shkurtin e vitit 2007.

“Deri më tani Qeveritë tona kanë ra në gjumë dimëror dhe nuk kanë marrë kurrfarë hapi për të gjetë kriminelët që i rrahën dhe ushtruan dhunë mbi 80 njerëz. Dëmet e shkaktuara në njerëz nuk i bëjnë përshtypje Qeverisë sonë. Djemtë tanë nuk konsiderohen si mbrojtës të Kosovës, bile ish kryetari Hashim Thaçi para disa vitesh u vu në mbrojtje të policëve rumunë i cili tha se ata nuk i vrau policia rumune por LVV”.

Sipas tij, policët e UNMIK-ut, kriminelë, siç i quan ai, nuk janë gjetë ende edhe pas kaq kohësh.

“Jetën ia mori UNMIK-u përmes kontigjentit të policisë rumune. Protesta ishte paqësore ndaj planit të Ahtisarit që parashihte zgjidhje për të ardhmen e Kosovës që ishin jo pak por shumë të dëmshme. Këto zgjidhje po shihen tash sa na kanë bë dëm. LVV e pa këtë rrezik”.

Ndryshe, 12 vjet më parë, nën organizimin e Lëvizjes Vetëvendosje, u mbajt protesta ku kërkohej vetëvendosje, ndërsa policia e UNMIK-ut, konkretisht ata të regjimentit rumun e ukrainas, shtënë në me armë ndaj protestuesve, duke lënë të vdekur 2 protestues dhe plagosur mbi 80-të.

Sot, Lëvizja Vetëvendosje, në nderim dhe kujtim të protestës së 10 shkurtit 2007, organizon, në orën 10:00 – Homazhe tek varri i Arben Xheladinit në Prishtinë; 12:00 – Homazhe tek varri i Mon Balaj në Besianë, dhe në orën 13:00 – Homazhe tek pllaka përkujtimore e dëshmorëve Arben Xheladini dhe Mon Balaj në bulevardin “Nënë Tereza”.