13 Tetori, Basha me Aleatët: KQZ të përgatis zgjedhjet. Nesër…
Opozita e Bashkuar ka filluar përgatitjet për zgjedhjet e dekretuara të 13 Tetorit. Në takimin që zhvilloi me Aleatët, Kryetari i Partisë Demokratike, Lulzim Basha, është shprehur se KQZ e ka detyrim të pashmangshëm të përgatisë zgjedhjet e 13 Tetorit si i vetmi akt në fuqi kushtetuese.
“Shteti dhe partia janë dy gjëra të ndryshme. Ka një ndryshim rrënjësor midis të drejtës kushtetuese dhe të drejtës partiake. I vetmi akt në fuqi kushtetuese në lidhje me zgjedhjet është Dekreti i Presidentit për zhvillimin e zgjedhjeve më 13 tetor,” tha Lulzim Basha para Aleatëve dhe bazuar në këtë Dekret të Presidentit, KQZ dhe institucionet tjera shtetërore e kanë detyrim të përgatisin infrastrukturën për këto zgjedhje:
“Është detyrim i pashmagshëm dhe i padiskutueshëm i KQZ-së dhe institucioneve të tjera shtetërore të përgatisin infrastrukturën për këto zgjedhje. Partitë politike, pastaj, kanë të drejtën e tyre të marrin apo jo pjesë në këto zgjedhje.”
Pas takimit me Kryetarin e Partisë Demokratike, Lulzim Basha, Aleatët, Lëvizja Socialiste për Integrim, Partia Republikane dhe Partia Agrare Ambientaliste zyrtarizojnë këtë qëndrim duke dorëzuar në Komisionin Qendror të Zgjedhjeve edhe kërkesën për regjistrimin në zgjedhjet e 13 Tetorit.
Partitë opozitare kërkojnë nga KQZ që të marr të gjitha masat për organizimin e zgjedhjeve në datën e dekretuar nga Presidenti i Republikës.
Ndryshe, me kërkesën e kryetarit të KQZ, Klement Zguri, është vendosur që nesër në orë 10:00 Komisioni Qendror i Zgjedhjeve të shqyrtoj Kërkesën për fillimin e procedurave për zgjedhjet për organet e qeverisjes vendore të datës 13.10.2019 e cila është bërë nga Lëvizja Socialiste për Integrim, Partia Republikane dhe Partia Agrare Ambientaliste .
