13 vjet Shtet, Vjosa Osmani e Albin Kurti homazhe te shtetformuesit

Presidentja Vjosa Osmani pas ngritjes së flamurit të shtetit të Kosovës, ceremoninë e shënimit të Ditës së Pavarësisë e vazhdoi me Kryetarin e Lëvizjes Vetëvendosje, Albin Kurti, duke bërë homazhe te ata që kanë kontributet më të mëdha në krijimin e shtetit.

Fillimisht dy krerët e ardhshëm të shtetit, Vjosa Osmani dhe Albin Kurti bënë homazhe te varri i Presidentit historik të Kosovës, Ibrahim Rugovës.

“Filluam ceremoninë me ngritjen e flamurit shtetëror nga Ushtria jonë dhe tani po vazhdojmë me homazhe tek njerëzit që kanë dhënë gjithçka që ne sot ta gëzojmë lirinë e Pavarësinë. E nderuam njeriun që sublimoi dhe unifikoi kërkesat e qytetarëve për liri dhe Pavarësi për njeriun që i hapi dyert e botës në mënyrë që zëri ynë të dëgjohet kudo,” tha Presidentja Osmani pas homazheve ndërsa Albin Kurti kujtoi dëshmorët dhe martirët, falë të cilëve tha se e gëzojmë lirinë.

“Sot kujtojmë personalitetet kombëtare historike që kontribuuan në faza e mënyra të ndryshme andaj vendosëm lule të freskëta te presidenti i parë doktor Ibrahim Rugova që ishte edhe presidenti i parë në Kosovën e çliruar për të vazhduar në aktivitete të tjera,”tha Kurti duke falënderuar qytetarët që kanë kontribuar për këtë ditët dhe kujtojmë të gjithë dëshmorët dhe martirët ata të cilët nuk janë më e falë të cilëve e kemi lirinë.

Më pas Presidentja e Kosovës dhe Kryetari i Vetëvendosjes bënë homazhe  në Prekaz, aty ku është dhe dëshmia më e fuqishme për atdhedashuri.

“Bashkarisht ta nderojmë vendin që është ikonë e lirisë vendin ku prehen komandanti legjendar dhe gjithë familja Jashari që janë simbol i sakrificës të popullit shqiptar për liri. Këtu gjenden dëshmitë e gjenocidit serb dhe është dëshmia më e fuqishme për atdhedashuri. Në këtë përvjetorë përkulemi para veprës së komandantit legjendar dhe gjithë dëshmorëve,” tha Osmani ndërsa Kurti shtoi se Prekazi tregon se çmimi i lirisë është shumë i lartë.

“Prekazi heroik është vendi i kushtrimit për çlirim dhe vendi që na e përkujton se sa i lartë është çmimi i lirisë, dhe se sa të priveligjuar jemi ne që jetojmë dhe e festojmë 13 vjetorin e Pavarësisë. Tre breza të familjes Jashari luftuan dhe sakrifikuan, dhe duke u kthyer këtu ne e bëjmë më të fuqishëm shtet ndërtimin demokratik sepse i tillë është amaneti i dëshmorëve,” tha Kryetari i Lëvizjes Vetëvendosje Albin Kurti ndërsa Kryetari i Komunës Skenderaj, Bekim Jashari, në këtë 13 vjetor shtoi:

“Është nderë për mua që sot t’i shoqërojë delegacionet më të larta shtetërore!”

Me rastin e 13-vjetorit të Pavarësisë së Kosovës, Presidentja Vjosa Osmani bashkë me Kryetarin e Lëvizjes Vetëvendosje, Albin Kurti, bënë homazhe edhe pranë varrit të veprimtarit kombëtar, Adem Demaçi.

“Sapo nderuam simbolin e rezistencës së shqiptarëve në Kosovë. Njeriun i cili para lirisë individuale e vendosi lirinë kolektive dhe para interesit të vet, e vendosi interesin e përgjithshëm. Veprimtarin e çështjes kombëtare, zotëri Adem Demaçi,” tha Vjosa Osmani ndërsa Albin Kurti shtoi se Adem Demaçi është shqiptari që nuk është thyer dhe dorëzuar asnjëherë.

“Me të drejtë baca Adem Demaçi është quajtur Mandela shqiptar, por unë do të thoja se as më Evropë nuk ka një shembull të ngjashëm me 28 vite burg është shqiptari që ka vuajtur më së gjati, por që edhe që nuk është thyer dhe dorëzuar asnjëherë”, tha ai.