14 vjetori i mashtrimit rilindas, sërish zotime për 21 Janarin
Ndryshe nga Presidenti i SHBA, Donald Trump, i cili sapo u ul në Shtëpinë e Bardhë u mor me ata që protestuan për të në vitin 2020 dhe u dënuan nga pushteti Biden, Edi Rama, ata që kishte thirrë në protestën e 21 Janarit të vitit 2011 para Kryeministrisë vazhdon ti ushqej me premtime ndërsa njeriun nga Grupi i Zjarrit që kishte shtënë mbi ta e gradoi në krye të strukturave partiake dhe bashkisë nga vinte ky njeri, Agron Malaj!
Sot, ashtu si 12 vitet tjera në pushtet, Kryeministri Edi Rama akuzon ata që nuk zbardhën të vërtetën mbi ngjarjes tragjike ku mbetën të vrarë katër protestues:
“Sot kush po e vonon drejtësinë për 21 janarin, nuk duhet të harrojë se fëmijët e dëshmorëve po bëhen prindër duke pritur drejtësinë.”
“21 Janar, Drejtësia vonon po nuk harron, thotë populli dhe sot kush po e vonon drejtësinë për 21 janarin, nuk duhet të harrojë se fëmijët e dëshmorëve po bëhen prindër duke pritur drejtësinë,” shprehet Kryeministri Edi Rama përmes rrjetit social Facebook ndërsa më nuk pret që me familjarët e manipuluar të bëjë homazhet e radhës për viktimat që ranë pre e protestave që organizoi vetë.
Pse përmes rrjetit social Facebook?! Sepse sot pas 14 viteve Edi Rama më nuk ka kohë as për homazhe në bulevard dhe ngarkon për këtë ceremoni të radhës, si gjithmonë, të kudondodhurin në aheng ose vaki, Taulant Ballën!
Arsyeja ishte madhore! Kryeministri i Shkodrës, Himarës e gjithë Shqipërisë udhëtoi drejt Davosit ku u tha se do të marrë pjesë në Forumin Ekonomik!
Ndryshe, dosja “21 Janari” aktualisht po hetohet nga Struktura e Posaçme Kundër Korrupsionit dhe Krimit të Organizuar pas një vendimi të Gjykatës së Lartë më 12 mars 2024, strukturë që vetë Edi Rama tha se e themeloi Partia Socialiste.
E drejtë legjitime e familjarëve që vazhdojnë dhe kërkojnë përgjegjësit për vrasjen e Aleks Nikës, Ziver Veizit, Hekuran Dedës dhe Faik Myrtajt, por, e sigurt është se ata nuk do të zbulohen nga njerëzit që i ftuan 21 Janarin e vitit 2011, ti vënë flakën Kryeministrisë, dhe sot janë në pushtet!
