17 vjet shtet, Presidenti Trump uron Kosovën

Duke përgëzuar popullin e Kosovës për rrugëtimin drejt pavarësisë ndërsa vë në pah qëndrueshmërinë dhe vendosmërinë që e kanë shoqëruar këtë proces, Presidenti i Shteteve të Bashkuara, Donald Trump, në urimin e tij me rastin e 17 vjetorit të shpalljes së pavarësisë thekson mbështetjen e fuqishme të SHBA për Kosovën dhe angazhimin e saj për ndërtimin e një shoqërie demokratike për të gjithë qytetarët, pa dallim.

Në urimin drejtuar Presidentes Vjosa Osmani, Presidenti Trump i cilëson të forta lidhjet mes popullit të Kosovës dhe atij të Shteteve të Bashkuara ndërsa shtron nevojën që ato të zgjerohen edhe më shumë.

“Lidhjet midis njerëzve tanë janë të forta dhe ne presim me padurim t’i zgjerojmë ato lidhje, duke përfshirë rritjen e mundësive për investime, për të sjellë prosperitet më të madh për të dy kombet tona. Shtetet e Bashkuara do të vazhdojnë të punojnë me Kosovën, derisa ajo t’i forcojë institucionet demokratike dhe të promovojë rritjen ekonomike nëpërmjet një mjedisi të qëndrueshëm dhe të lirë biznesi,” tha Donald Trump ndërsa thekson se prest me padurim ndërtimin e një marrëdhënie më produktive me qeverinë e Kosovës në vitin e ardhshëm dhe për të vazhduar integrimet euroatlantike.

“Shtetet e Bashkuara mezi presin të ndërtojnë një marrëdhënie më produktive me Qeverinë e Kosovës në vitin që vjen. Ndërsa punojmë me Kosovën dhe fqinjët e saj për të ndërtuar një rajon më të begatë dhe më të sigurt, është e rëndësishme që Kosova të integrohet më tej me komunitetin euroatlantik. Mbështetja e palëkundur e Kosovës për Ukrainën përballë agresionit rus vlerësohet shumë,” tha Presidenti i SHBA, Donald Trump, duke përfunduar:

“Dita e Pavarësisë së Kosovës është një moment për të reflektuar mbi arritjet e deritanishme dhe për të parë drejt një të ardhmeje edhe më të ndritur.”