195 persona me statusin e viktimës së dhunës seksuale

Komisioni për të Drejtat e Njeriut, Barazi Gjinore, për Persona të Pagjetur dhe Peticione sot është takuar me përfaqësuesit e Komisionit Qeveritar për njohjen dhe verifikimin e statusit të personave të dhunuar gjatë luftës së fundit në Kosovë. Takimi zgjati dy orë, dhe për shkak të konfidencialiteti, ai u mbajt pa praninë e mediave.

Pas përfundimit të takimit u bë e ditur se 911 persona kanë aplikuar për t’iu njohur statusi, ndërsa  prej tyre 195 personave iu është njohur statusi  si viktimë e dhunës seksuale.

Kryetarja e Komisioni për të Drejtat e Njeriut, Barazi Gjinore, për Persona të Pagjetur dhe Peticione, Duda Balje se janë njoftuar se çka ka bërë Komisioni qeveritar për njohjen dhe verifikimin e statusit të personave të dhunuar gjatë luftës, në vitin e parë të punës.

Sipas saj, do të ishte shumë me rëndësi  që sa më shpejt të krijohet një data-bazë, si dhe të bëhet e ditur se konfidencialiteti i atyre që duan ta marrin këtë status është i lartë. Ajo u shpreh se si anëtar të komisionit kanë ofruar përkrahje kur dihet se tema është mjaft e ndjeshme.

Minire Begaj, kryetare e Komisionit qeveritar për njohjen dhe verifikimin e statusit të personave të dhunuar gjatë luftës së fundit në Kosovë, u shpreh se puna që po bëhet në këtë komision do të ndihmojë për qasjen në drejtësi.

Ajo ka sqaruar se deri tani kanë pranuar 911 aplikacione, ku prej tyre iu njihet statusi 195 personave që gëzojnë pension prej 230 euro.

Sipas saj, është shumë e rëndësishme që shoqëria dhe viktimat të sensibilizohen sa më shumë përmes fushatave të ndryshme ndërgjegjësuese.

Ndryshe, procesi për njohjen dhe verifikimin e statusit të personave të dhunuar gjatë luftës së fundit në Kosovë ka nisur në fillim të muajit shkurt të vitit të kaluar, përmes të cilit personat e dhunuar seksualisht fitojnë të drejtën për të marrë pensionin prej 230 eurosh