2 Prilli 1991, Spahia: Sot, 31 vite më pas, lagimi i regjimit Edi Ramës, emergjencë kombëtare!
Ditë e trishtueshme ishte 2 prilli 1991 por dhe prologu i fundit i diktaturës komuniste, tha Kryetari i ri i Bashkisë Shkodër, Bardh Spahia, në fjalën e tij me rastin e përkujtimit të katër dëshmorëve të demokracisë, duke shtuar se Shkodra e dha provën se nuk i përkulet regjimit dhe është koha që fryma e bashkimit dhe e përballjes me të keqes të përhapet në të gjithë vendin.
“Ranë katër djem të Shkodrës dhe si u plagosën më shumë se qindra qytetarë. 2 prilli 1991 ishte ditë e trishtueshme, por ishte edhe prologu i fundit i pashmangshëm i diktaturës komuniste.
Sot, 31 vite më pas, Shkodra dhe qytetarët e saj e gjejnë veten sërish në betejë dhe kudo kumbon thirrja Liri – Demokraci.
Bashkimi ynë, pavarësisht mosdakortësive është amanet jo vetëm i dëshmorëve të demokracisë. Është emergjencë kombëtare, largimi i këtij regjimi,” tha Kryetari i ri i Bashkisë Shkodër, Bardh Spahia duke përfunduar:
“Shkodra e dha provën e saj të radhës që nuk i përkulet regjimit. Tashmë është koha që nga Shkodra, fryma e bashkimit dhe e përballjes me të keqes të përhapet në të gjithë vendin, është amanet i dëshmorëve. Nderim dhe mirënjohje përjetë heronjve të demokracisë!”
Duke nderuar 4 martirët familjarët dhe qytetarët shkodranë, Ish-Presidenti Sali Berisha tha se sot pas 31 vitesh të martirizimit të tyre vota e lirë është tërësisht e konfiskuar nga sistemi kriminal i patronazhistëve, nga tregu kriminal i blerjes dhe shitjes së votës, nga bandat e qeverisë.
“Jemi mbledhur këtu për të nderuar veprën dhe kujtimin e martirëve të votës së lirë. Themeluesit dhe anëtarit të kryesisë së PD-së Arben Broci, aktivistëve të shquar të PD-së Bujar Bishanaku, Nazmi Kryeziu, Besnik Ceka, por edhe të 87 qytetarëve të Shkodrës që në një masakër terroriste u plagosën atë ditë në rrugët dhe sheshet e këtij qyteti, bastion të lirisë.
Më 2 prill 1991, gjimnazistët e Shkodrës e ndjenë se regjimi i Ramiz Alisë grabiti votën e qytetarëve dhe ata mbushën këtë shesh në një protestë më të civilizuarën që mund të bëjë njeriu i lirë, të ulur mbi çantat e librave, protestonin paqësisht. Regjimi diktatorial do të festonte fitoren e grabitur me gjakun e tyre. Mbi ta të rrethuar u shkrehën batare, kallashnikovë dhe mitralozash. Në shesh mbetën, ranë për t’u bërë përjetë të pavdekshëm, martirë të 2 prillit, u plagosën në rrugët e qytetit dhjetëra e dhjetëra qytetarë shkodranë. Flijimi, sakrifica sublime e tyre në të vërtetë u bë dritë për shqiptarët.
Masakra e 2 prillit jehoi fuqishëm në Kongresi ne SHBA-ve, parlamentin Europian, Asamblenë Parlamentare të Këshillit të Europës. Diktatori që shpresonte të vishte me zgjedhjet e 31 marsit xhaketën e Gorbaçovit, dëshmoi para shqiptarëve dhe gjithë botës se ai nuk ishte gjë tjetër përveçse një bastard kriminel i Hitlerit të pasluftës Enver Hoxhës,” tha lideri historik i PD, Sali Berisha duke nderuar veprën e pavdekshme të martirëve të demokracisë të cilët do të jetojnë për jetë të jetëve me lirinë dhe votën e lirë të shqiptarëve.
“Por sot ne nderojmë kujtimin e tyre në një ditë të vështirë për Shqipërinë dhe shqiptarët. Ish-presidenti i SHBA-ve, Ronald Regan do të deklaronte se lirisë nuk i duhet më shumë se një gjeneratë që edhe të zhduket. Sot pas 31 vitesh të martirizimit të tyre vota e lirë është tërësisht e konfiskuar nga sistemi kriminal i patronazhistëve, nga tregu kriminal i blerjes dhe shitjes së votës, nga bandat e qeverisë.
Martirët e 2 prillit sot më shumë se kurrë kanë një apel për të rinjtë shqiptarë, të vazhdojnë betejën e tyre për votën e lirë. Sot shqiptarët nuk përballen me një diktaturë staliniste, por me një qeveri e cila siç faktohet çdo ditë përbën një organizatë të vërtetë kriminale. Një qeveri e cila njëlloj si një organizatë kriminale vjedh dhe plaçkit shqiptarët, votën e tyre, liritë e tyre, pasuritë e tyre dhe kjo përbën një kushtrim, një apel për çdo demokrat, çdo qytetar, të bashkojmë forcat për të çliruar Shqipërinë, të frymëzuar nga Shkodra, nga kjo klikë e cila nuk ka asgjë të përbashkët me idealet e lirisë për të cilat u sakrifikuan martirët e Shkodrës, me idealet lirisë të qytetarëve të Shkodrës dhe qytetarëve shqiptarë,” tha Ish-Presidenti Sali Berisha duke përfunduar:
“Ndaj le të zotohemi ne para kujtimit, veprës së 4 martirëve se do bëjmë gjithçka, se jemi të gatshëm për çdo sakrificë, të rikthejmë votën e lirë të shqiptarëve, për të cilën këta të rinj flijuan veten dhe rininë e tyre. Rroftë Shkodra, nderim përjetë martirëve të 2 prillit, rroftë Shqipëria!”
Ndryshe, kanë kaluar 31 vjet demokraci shqiptare, por edhe 31 vjet ankth, akuza dhe kundërakuza, pabesi dhe dëshpërim për qytetarët e Shkodrës që vazhdojnë të kujtojnë ditën e terrorit komunist të 2 Prillit të vitit 1991, për të cilin vet regjimi komunist hetoi, gjykoi, por nuk e ka tha të vërtetën për vrasjen e 4 të rinjve dhe plagosjen e 78 qytetarëve të Shkodrës.
Ashtu siç e thonë vetë shkodranët, kjo masakër mund të jetë hakmarrje për meshën dhe lutjen e parë fetare në Shqipëri, përpjekjen për rrëzimin e bustit të Stalinit ose demonstratën e parë antikomuniste në kujtim të viktimave të kufirit shqiptar, por përveç kësaj, kjo masakër është edhe një gjakderdhje më shumë e komunistëve, regjimi i të cilëve kishte ditët e numëruara. Votën e popullit nuk e morën dot, por as pushtetin nuk po e dorëzonin dot.
