2025, Viti i Shpresës!
nga Agim Popoci
Kanë mbetur edhe shumë pak minuta të vitit 2024, që ndryshe nga bota normale, mund të jenë dhe shekuj të tërë për pjesën më të madhe të shqiptarëve që presin vitin 2025!
Jo vetëm pse lënë mbrapa një vit përplot me terror ushtarako-policor serb të Presidentit të Serbisë, Aleksandar Vuçiç, si në brezin kufitar serbo-shqiptar ashtu dhe atë mediatik në Kosovë, si dhe plagë të rënda nga dhuna dhe terrori shtetëror që serviri Edi Rama në tokën shqiptare për 11 vjet, por, që për pak minuta shkelin në vitin 2025 kur pritet të zhvillohen zgjedhjet parlamentare në Kosovë dhe Shqipëri me pritshmëri shumë të mëdha për ndryshimin e jetës së tyre, rezultati i të cilave pritet të reflektoj edhe në Luginë të Preshevës, Maqedoni të Veriut, Mal të Zi dhe gjithë Diasporën!
Është e vërtetë se shqiptarët në Kosovë triumfuan në vitin 2024 me liberalizimin e vizave në Zonën Schengen ndonëse kaluan një vit nën masa nga BE dhe Edi Rama, por, sot janë në pritje të 9 Shkurtit për të vulosur një Kosovë që e duan si të tillë, me Veri të integruar dhe të gatshëm për të çuar zhvillimin më tej, ose të dorëzohen para propagandës së batonëve dhe buzhalëve që me mish e me shpirt,ditë e natë, po punojnë që ta zbresin Albin Kurtin nga froni!
Pretendimi i Lëvizjes Vetëvendosje “500 K” është delir i llojit të vetë, por, pse ky pretendim po bëhet prezent gjithnjë e më shumë në artikulimin politik të kësaj Lëvizje, pjesën më të madhe të fajit e kanë LDK, PDK e AAK dhe strategjia e tyre me të cilën janë bërë gati të shkelin më 9 Shkurt! Shpërfillja e LDK-së së Ibrahim Rugovës që përgjëronte në vitin 2000 elektoratin që të votoj edhe të tjerët sepse nuk ka kuptim, deri te shpërfillja e Kosovës me të gjithëpushtetshmin Hashim Thaçi, largon këto parti të ish-pushtetshme nga realiteti dhe e bënë çmendurinë “500 K” më të besueshme, pavarësisht se është një dëm i madh real për demokracinë shqiptare, që do të lë pasoja të rënda në Kosovë për shumë kohë nëse realizohet!
Përveç kosovarëve, sytë nga Prishtina i kanë të drejtuara deri më 9 shkurt edhe Lugina e Preshevës, Maqedonia e Veriut, Mali i Zi dhe gjithë Diaspora që tashmë me Kryeminitër të Shqipërisë, Edi Ramën, kanë një dhe të vetmin shtet amë, Kosovën!
Shqiptarët e Luginës së Preshevës që për shumë kohë nuk e kishin të qartë pse atdheu i tyre nga disa quhej Kosova Lindore, e kuptuan me Kryeministër Albin Kurtin, se kjo tokë nuk ndihmohet pse duhet të ndihmohet por sepse është tokë shqiptare! Dhe, çdo ndihmë në rritje e sipër nga Qeveria e Kosovës e cila është dhënë deri më sot, nuk është dhënë për propaganndë si në të kaluarën!
Pozita e shqiptarëve në Maqedoninë e Veriut ndonëse deri më sot ka reflektuar nga pushteti që ishte në Tiranë, sot me Kryeministër Edi Ramën, shtypja e tyre u mundua t’i mvishet ndërhyrjes së Albin Kurtit, Kryeministër të Kosovës, në fushatën zgjedhore duke shpërfillur faktin se forca më meritore për çlirimin e shqiptarëve, BDI, u degradua nga brenda me shumë sukses nga ksilofagu maqedon që u fut ndër këto radhë dhe ishte në kontakt të vazhdueshëm me Kryeministrin aktual të Shqipërisë, Artan Grubi!
Shqiptarët në Mal të Zi ende nuk e kanë kuptuar se çfarë po ndodhë me shtetin ku ata jetojnë, por e kanë shumë të lehtë ta kuptojnë nëse e kthejnë kokën mbrapa në tre dekadat e fundit për të kuptuar se Podgorica ishte më afër Beogradit sa herë në Tiranë ishin në pushtet socialistët! Vetëm rastësi nuk mund të jetë meqë Edi Rama është Kryeministri i pestë socialist që shqiptarët në Mal të Zi i trajton po me këtë model!
Diaspora shqiptare, sot, vërtetë portën e vetme të hapur e ka atë të Albin Kurtit, por zgjedhjet parlamentare të 11 Majit në Shqipëri mund të hapin një portë të re jo vetëm për Diasporën!
Deri në hapjen e kësaj porte, në këtë Vit të Shpresës, shqiptarët nga frengjia mund ta shohin se si po afrohet 11 Maji si dita e fundit të terrorit shtetëror të Edi Ramës dhe krimit që shkatërroi gjithçka shqiptare!
Pse Edi Rama mbështeti kanabizimin e tokës shqiptare, koncesionimin e ujit, ajrit dhe tokës shqiptare në duart e ca injorantëve kastrat, mane e alabaar, ndëshkimin e Kosovës dhe favorizimin e Serbisë, dhe në fund ndërsimin e SPAK-ut drejt opozitës, mund të zbulohet vetëm më 11 Maj dhe për këtë do të vendosin vetë shqiptarët!
Nëse opozita mendon të shkel në këtë Ditë të Shpresës me skepticizmin që e ka pushtuar që sot ndërsa lexon letrat e qëndisura nga Çiftelia me Sigurimin e tij të Shtetit, nuk ka pse futet në këtë garë elektorale!
Por, nëse është e bindur vërtetë se ka përpara jo vetëm Ditën por Vitin e Shpresës, për model duhet ta merrë njeriun që kishte të njejtit armiq si opozita shqiptare, Sorosin, Prokurorinë, Gjykatat dhe mediat, dhe fitoi bindshëm zgjedhjet pa e menduar kurrë fitoren me një shumicë të thjeshtë prej 50+1%, Donald Trump në SHBA!
Si është e mundur kjo?! Formula e pagëzimit është zbatuar nga vetë Donald Trump i cili poashtu shikohej me skepticizëm në fillim madje nga e gjithë bota, por, marshimi i tij nga fitorja që iu vjedh në Nëntorin e vitit 2020 deri tek ngadhnjimi mbi perandorinë mashtruese të George Soros në Nëntorin e vitit 2024, është një manual i fitores që PD dhe opozitës shqiptare i ngelet si Manuali i Shpresës për ta zbatuar germë për germë! Nëse Po, Gëzuar Vitin e Shpresës!
