21 Janari!
nga Agim Popoci
Dhjetë vjet pas protestave të 21 Janarit ku mbetën të vrarë 4 pjesëmarrës, Policia e Edi Ramës i ka kërkuar Prokurorisë së Tiranës rifillimin e hetimeve për dosjen “21 Janari”.
Kërkesa për riekspertim teknik dhe ripyetje të dëshmitarëve në 21 Janarin e vitit 2014, do të ishte mëse normale pas pastrimit që Saimir Tahiri i bëri policisë me “njerëzit e Saliut”, dhe borxhin moral që kishte Edi Rama ndaj të vrarëve në një protestë që e kishte thirr vet!
Por riekspertimi teknik dhe ripyetja e dëshmitarëve 10 vjet pas kësaj ngjarje, mbanë shumë erë komuniste duke mos i lënë fare vend dhembshurisë dhe pengut që kishin ata pak bashkëpartiakë të viktimave të 21 Janarit.
Nëse kësaj i shtojmë edhe faktin se Policia e Tiranës që i kërkon Prokurorisë rifillimin e hetimeve për dosjen “21 janari”, ishte e vetmja që së bashku me shefin e saj heshtën kur Gjykata e Apelit vendosi të shuante burgimin e përjetshëm për Dritan Dajtit, duke e dënuar me 25 vjet burg, edhe pse kishte vrarë 4 kolegët e kësaj policie, atëherë nuk mbanë më erë, kutërbon!
Kutërbon ashtu si dhe vendimi i Edi Ramës për ta bërë President, shkaktarin e 21 Janarit, Ilir Metën!
Dhe në fund, kutërbon ashtu si vendimi për ta bërë Kryetar të Bashkisë Mat, Agron Malajn, drejtuesin e Njësisë së ndërhyrjes dhe Grupit të snajperëve në ditën e kobshme të 21 Janarit!
Sot 4 të vrarët në protestën e 21 Janarit u shpallën “Dëshmor i Atdheut” por familjarët e tyre morën përgjigjen pse partia në pushtet nuk e do të vërtetën, që më 8 shkurt të vitit 2019. Kur Gjykata e Apelit e bëri nul burgimin e përjetshëm për Dritan Dajtit i cili kishte vrarë 4 policë dhe e shndërroi dënimin me 25 vjet burg, çfarë do ti kërkonin ata Edi Ramës: Të vërtetën!
Ç’punë kishte Edi Rama me të vërtetën kur erdhi në pushtet, aq më shumë kur në krah kishte shkaktarin e 21 Janarit, Ilir Metën! Nuk e kundërshtoi njeri, vetëm Saliu le të ikë!
Iku dhe Saliu, kaluan edhe nëntë 21 Janar të tjerë dhe Edi Rama nuk kishte arsye të zgjonte taulantët e tij, kur kishte gjetur formulën e pagëzimit për të fituar zgjedhjet. Ata që protestuan më 21 Janar 2011 harruan për lekët e Ilir Metës, ashtu sikur se ato të firmave piramidale, dhe PPSH nuk ishte hera e parë që tallej me këtë milet.
Kështu bëri dhe Ilir Metën President, të po këtij mileti që protestoi më 21 Janar dhe gjashtë vite më pas e duartrokiti!
Pasi në zgjedhjet e vitit 2017 sprovoi një komunizëm ndryshe, me lekë, dhe ia arriti qëllimit meqë droga ishte mbjellë sheshit, në vitin 2019 nuk shkeli vetëm mbi viktimat, kaloi dhe ylberin.
Liria e Dritan Dajtit dhe heshtja jo vetëm e Policisë por edhe Prokurorisë që po reformohej, i konfirmoi Edi Ramës dhe jo vetëm, se e vërteta në këtë vend më nuk ka vlerë. Hetimet ndaj 3 gjyqtarëve që i dhuruan lirinë Dajtit, për SPAK duhej të mbylleshin dhe kot që Gjykata e Posaçme për Korrupsionin dhe Krimin e Organizuar urdhëruan kryerjen e veprimeve të tjera hetimore.
Këto veprime nuk e quan drejtësinë në vend por i dhanë të drejtë Edi Ramës që personin i cili u akuzua si pjesë e “Grupit të Zjarrit” ta shpërblejë sepse e kishte informuar imtësisht për 21 Janarin. Kështu dhe ndodhi e sot Agron Malaj nuk është rastësisht Kryetar i Bashkisë Mat! Ashtu siç nuk ishte rastësisht pjesë e Gardës së Republikës e cila në zgjedhjet e vitit 2009 i dha Partisë Demokratike në pushtet vetëm 39 vota, nga 400 sa kishin votuar, sepse në këtë repart komunist Partia e Punës ishte në pushtet!
Sot kur Policia e Shtetit nuk kërkon drejtësi as për policët e saj të vrarë, kur SPAK i do vrasësit në liri, çfarë ka Edi Rama që i poshtëron!
E ka një hall! Po, dhe shumë të madh. Por të gjithë ata që mendojnë se Edi Rama u shqetësua për rezultatet e sondazheve që u publikuan gjatë këtyre ditëve, e ka shumë gabim. Ky njeri që vetëm një mandat në jetën e tij punoi, dhe ishte i pari si kryebashkiak të cilin nuk e fitoi për herë të dytë me ndershmëri as përball Spartak Ngjelës, e ka kuptuar artin e mashtrimit zgjedhor; Dhe për këtë çështje angazhohet me gjithë qenien e tij duke bërë shumë më shumë sondazhe se sa bëjnë pronarët e mediave që ky i bëri me lekë.
Të gjithë ata që e lodhin trurin me Kode Zgjedhore të sofistikuara, dhe si qershi mbi KQZ përdorin Celibashin, duhet ta marrin më seriozisht kutinë e votimit, e cila për Edi Ramën nuk ekziston fare!
Në prag të zgjedhjeve të 25 Prillit, kur Edi Rama e ka shpall edhe fitoren për mandatin e tij të tretë, ai do të përdor gjithë arsenalin e propagandës që ka në dispozicion. Atë që nuk e ka do ta blejë ose shantazhoj dhe pak rëndësi ka se kush do të shpallet fajtor për 21 Janarin vetëm le të dëmtohet rivali sepse oligarkët vazhdojnë dhe i fryjnë në vesh: POPULLI ËSHTË I PAKËNAQUR!
