21 vjet nga eksodi i kosovarëve, Faleminderit Shqipëri!

Në përkujtim të 21-vjetorit mikpritjes së Shqipërisë gjatë eksodit të popullit të Kosovës në vitin 1999 është mbajtur akademi solemne “Faleminderit Shqipëri”.

Kjo akademi  organizohet në shenjë falënderimi shqiptarëve dhe Shqipërisë, për mikpritjen e ofruar dhe dashurinë vëllazërore që kemi përjetuar në momentet më të vështira të historisë së re të Kosovës.

Ipeshkvi Don Viktor Sopi, nga Caritas Kosova, shprehu falënderim për çdo familje dhe institucionet e Shqipërisë për përkrahjen gjatë eksodit  të popullit të Kosovës në vitin 1999.

“Carsitas Kosova kishte kënaqësinë të bënë këtë falënderim në tempullin me emër Pjetër Bogdani që t’ju themi institucioneve të Shqipërisë familje t’ju themi falënderim kur ishte një eksod biblik”.

“Kur dashuria ndahet ajo bëhet më e madhe, them faleminderit Shqipëri”, tha ai.

Imzot Dodë Gjergji, tha se edhe pse viti 1999 ishte i tmerrshëm, demonstrimi i dashurisë dhe mirëpritjes nga populli i Shqipërisë e ka bërë më të lehtë, këtë dhimbje.

“Viti 1999 ishte një vit i tmerrshëm, por nëse duam të shohim në dimensionin pozitiv atëherë ka qenë viti i demonstrimit të dashurisë dhe bujarisë shqiptare në Shqipëri ku kanë hapur dyert e zemrave t’i pranojnë vëllezërit nga Kosova që kanë qenë të dëbuar dhunshëm nga shtëpitë e tyre”, tha ai duke përfunduar:

“Ndihma ishte e menjëhershme e gjithanshme dhe e shumëllojshme. Mendoj se këta njerëz meritojmë një falënderim. Një falënderim i tillë nuk ka munguar. Kjo s’do të mjaftonte po mos të kishim mbështetjen e kishave dhe institucioneve të tjera fetare.”

Në këtë akademi solemne morën pjesë, Presidenti Hashim Thaçi, Presidenti i Shqipërisë, Ilir Meta, kryeministri në detyrë, Ramush Haradinaj, Ish-Presidenti Fatmir Sejdiu, Ish-Kryeministri i Shqipërisë, Pandeli Majko, kryetari i Lëvizjes Vetëvendosje, Albin Kurti, etj.