23 vjet nga masakra në Tregun e Mitrovicës
Në Mitrovicë sot u përkujua masakra që ndodhi në Tregun e këtij qyteti 23 vite më parë ku mbetën të vdekur 6 qytetarë ndërsa u plagosun 128 të tjerë.
Familjarë të viktimave e martirëve, si dhe qytetarë tjerë, përfaqësues të institucioneve komunale dhe asociacioneve të tjera në Mitrovicë, nderuan viktimat në vendin e ngjarjes, aty ku 23 vjet më parë ndodhi masakra në Tregun e Mitrovicës.
Ndërkohë Presidentja e Kosovës, Vjosa Osmani, duke kujtuar viktimat e sulmit me minahedhës në Tregun e Mitrovicës 23 vjet më parë shprehet se ky sulm shpërfaqë barbarinë e regjimit gjenocidal serb.
”Sulmi me minahedhës në Tregun e Mitrovicës 23 vjet më parë, shpërfaqë barbarinë e regjimit gjenocidal serb, i cili ia mori jetën gjashtë qytetarëve dhe la të plagosur 128 të tjerë. Në këtë përvjetor, nderojmë kujtimin për të vrarët dhe riafirmojmë nevojën për drejtësi. I përjetshëm qoftë kujtimi për të vrarët në Tregun e Mitrovicës!” thekson Presidentja e Kosovës, Vjosa Osmani duke shprehur respekt të madh ndaj atyre që u vranë dhe atyre që jetojnë më traumat nga ky akt është vendosja e drejtësisë.
Ndryshe, më 13 Mars të vitit 1999, forcat serbe sulmuan me minahedhës Tregun e Mitrovicës në kohën kur ai ishte përplot me njerëz, ku mbetën të vdekur 6 qytetarë, në mesin e të cilëve kishte fëmijë dhe gra, ndërsa u plagosën 128 të tjerë.
