24 orë në Itali, 636 të vdekur nga koronavirusi

Italia ka regjistruar të hënën 636 vdekje të reja, apo rreth 100 më shumë sesa një ditë më parë, tha Mbrojtje Civile duke përditësuar të dhënat ndonëse numri i rasteve të reja me koronavirus ka rënë dukshëm.

Numri total i të vdekurve në këtë shtet nga virusi ka arritur në 16,523, çka përbën shifrën më të lartë në botë, raporton RFE. Numri i rasteve të reja të infektuara me sëmundjen COVID-19, që shkakton koronavirusi është rritur për 3,599 apo 132,547, në total, ndonëse kjo është shifra më e ulët për të cilën është raportuar nga 17 marsi.

Aktualisht Shtetet e Bashkuara janë kthyer në epiqendër të përhapjes së kësaj sëmundjeje, pasi është raportuar për 338,995 persona të infektuar dhe 9,683 të vdekur.

Franca ka raportuar për 833 vdekje në 24 orë si pasojë e infektimit me koronavirus, njëherësh shifrën më të lartë, prej shpërthimit të sëmundjes. Të dhënat përfshijnë njerëzit që kanë vdekur në spitale dhe azile për pleqë. Numri total i të vdekurve nga koronavirusi tani në këtë shtet ka arritur në 8,911- shifrën e tretë më të lartë pas Italisë dhe Spanjës.

“Ende nuk e kemi arritur fundin e epidemisë,” tha Ministri i Shëndetësisë, Oliver Veran.

Spanja është vendi i dytë i prekur më së keqi nga koronavirusi, pasi në këtë shtet është raportuar për 135,032 persona të infektuar dhe 13,169 të vdekur.