25 Prilli, Kolegji Zgjedhor rrëzon padinë e PD për pavlefshmëri të zgjedhjeve në Vlorë
Kolegji Zgjedhor ka rrëzuar padinë e Partisë Demokratike për shpalljen e pavlefshme të zgjedhjeve të 25 Prillit në Qarkun Vlorë. Ndërkohë trupa gjykuese nuk kishte pranuar as kërkesën e PD për marrjen e provave shtesë për Qarkun Vlorë.
Ky vendim i Kolegjit Zgjedhor erdhi edhe pas fakteve të masakrës zgjedhore të 25 Prillit në Qarkun Vlorëqë që solli Përfaqësuesi ligjor i Partisë Demokratike, Ivi Kaso, ku foli dhe me emra konkret të pushtetit vendor që, sipas tij, kanë ndikuar në vullnetin e qytetarëve.
“Afrim Qendor, Klodian Troci, Erion Osmanaj me veprime konkrete kanë konsumuar vepra penale të shpërdorimit të detyrës. Këta shtetas kanë përdorur administratën nën presionin për largimin nga puna. Kanë përdorur asete të tjera, legalizime në këmbim të votës. Kanë dhënë edhe para në këmbim të votës si dhe kanë mbledhur karta identitetit. Këto fakte ashtu si janë mbledhur nga strukturat tona dhe janë dorëzuar në SPAK. Këto i kemi paraqitur edhe para jush. Shit-blerja e votës është jo vetëm një konstatim i joni, por edhe një problem i bërë i ditur edhe në raportin paraprak të OSBE ODIHR,” tha Kaso duke përfunduar:
“Vetë SPAK ka informuar misionin e ODIHR që deri në 24 prill kjo struktura ka në hetim më shumë se 30 çështje që lidhen me shitblerjen e votës. Ka pasur edhe vendimmarrje të tjera në kundërshtim me aktet ligjore.”
Ndryshe, Partia Demokratike vazhdon betejën ligjore me ankimimet në Kolegjin Zgjedhor për 9 qarqe ku kërkon prova shtesë nga institucionet dhe shpalljen e pavlefshme të zgjedhjeve.
