25 Prilli/ Pas DASH, Ambasadorja e SHBA uron Ramën dhe vlerëson Bashën

Pas Departamentit amerikan të Shtetit edhe Ambasadorja e SHBA, Yuri Kim, ka uruar Edi Ramën për fitoren në zgjedhjet parlamentare të 25 Prillit dhe ka vlerësuar Lulzim Bashën për frymëzimin e shpresës.

“Përgëzojmë kryeministrin Edi Rama dhe Partinë Socialiste për fitoren e tyre elektorale. Ne gjithashtu përgëzojmë dhe kryetarin e PD, Lulzim Basha, për udhëheqjen e një fushate të fortë, që i dha zë shumëkujt dhe frymëzoi shpresë. Më e rëndësishmja, ne përgëzojmë popullin shqiptar, i cili foli qartë,” tha Ambasadorja Yuri Kim në reagimin e saj përmes rrjetit social Twitter duke shtuar:

“Duke njohur rezultatin e këtyre zgjedhjeve dhe duke bashkëpunuar me njëri-tjetrin, udhëheqësit do të veprojnë me përgjegjësi për të mirën e popullit shqiptar. Ne shpresojmë të punojmë me Shqipërinë për të forcuar më tej bashkëpunimin mbi demokracinë, mbrojtjen dhe biznesin. Raporti paraprak i OSBE/ODIHR duhet të përdoret për të përmirësuar më tej zgjedhjet në Shqipëri,” tha Ambasadorja e SHBA, Yuri Kim, duke përfunduar:

“Ne përsërisim që zbatimi i ligjit dhe gjyqësori duhet të ndjekin penalisht cilindo që shkel ligjin dhe pengon të drejtën e qytetarëve për të votuar lirshëm dhe në paqe.”