25 vjetori Masakrës Reçakut, Osmani: Autorët e këtij krimi kundër njerëzimit të dalin para drejtësisë!
Presidentja Vjosa Osmani, tha se masakra është e Reçakut është kujtesë. Ajo tha se kjo masakër ndërgjegjësoi botën për këtë krim të tmerrshëm. Osmani tha se masakra e Reçakut është kthesë e gjithë përpjekjes për liri kundër regjimit të Millosheviqit.
Sipas saj 15 janari i vitit 1999 i tronditi themelet e ndërgjegjes njerëzore kudo në botën demokratike. Bota përjetoi një ndër masakrat më të tmerrshme që ka ndodhur në Evropë në fund të shekullit XX.
“Në masakër ka dëshmitarë të gjallë që përjetuan llahtarinë e asaj dite. Përpos banorëve të mbijetuar, dëshmitë e të cilëve janë thelbësore për zbardhjen e autorëve të krimit, kjo masakër pati një kryedëshmitarë që ndodhet me ende edhe në këtë përvjetor. Ambasadori William Walker. Kjo dëshmi e fuqishme i dha kthesë gjithë përpjekjes tonë për liri kundër gjenocidit të Millosheviçit,” tha Presidentja Vjosa Osmani duke kërkuar që autorët e këtij krimi kundër njerëzimit të dalin para drejtësisë ndërsa përfundoi:
“Thirrja për drejtësi për ta është në funksion të mbrojtjes së dinjitetit njerëzor. Kërkimi i drejtësisë është detyrë e shenjë që kapërcen kufijtë, etnitë dhe përkatësitë etnike. Familjet e të masakruarve meritojnë që autorët e këtij krimi kundër njerëzimit të dalin para drejtësisë.”
Ndërsa Kryeministri i Kosovës, Albin Kurti, tha se 25 vite më parë Serbia aktivizoi tërë aparatin e saj shtetëror për ta mjegulluar dhe fshehur krimin, dhe dihet se kush ishte Ministër i Informacionit, Aleksandar Vuçiç, i cili në vazhdimësi e ka mohuar këtë krim makabër të kryer nga shteti serb.
“Masakra e Reçakut këtu e 25 vjet më parë, ku u vranë 45 civilë shqiptarë e tronditi si opinionin publik ndërkombëtar, gjithashtu edhe diplomacinë botërore dhe e bëri të domosdoshëm ndërhyrjen ushtarake të NATO-s për të ndalur gjenocidin e Serbisë në Kosovë.
Kur ndodhi masakra e Reçakut, Ambasadori William Walker si udhëheqës i misionit të OSBE-së në Kosovë erdhi këtu te fshatarët dhe e foli të vërtetën, tha kjo është masakër dhe krim kundër njerëzimit. E dimë që e vërteta është armiku më i madh i diktatorëve dhe shovinistëve andaj edhe sot e kësaj dite ambasadori William Walker vazhdon të jetë ndërkombëtari më i sulmuar edhe më i urryer në Serbi, ku vazhdon të dominojë një regjim autoritar me ç’rast ish-ministri i informatave të asaj kohe sot është president i Serbisë,” tha Kryeministri Kurti duke kujtuar dhe 11 ushtarët e Ushtrisë Çlirimtare të Kosovës, të cilët kanë rënë në betejë duke mbrojtur trupat e masakruar në këtë fshat.
“Më 15 janar në një dimër jashtëzakonisht të ftohtë pati ndodhur ky krim makabër, ndërkaq varrimi i 45 civilëve ka ndodhur vetëm katër javë më vonë sepse ka pasur luftë të madhe për Kosovën. I kemi edhe 11 ushtarë të UÇK-së që kanë rënë në betejë për mbrojtjen e trupave të masakruar nga Serbia dhe ato katër javë tregojnë se Serbia është përpjekur ta deformojë të vërtetën, ta justifikojë krimin dhe prandaj edhe një herë po e theksoj rëndësinë e të vërtetës të ambasadorit William Walker, të cilit i jemi mirënjohës që në një moment historik për popullin tonë e foli vetëm të vërtetën.”
Në fund, Ish-Shefi i Misionit Verifikues për Kosovën, Ambasadori William Walker, ky dëshmitar i të vërtetës së madhe që sot bota e njeh si Masakra e forcave serbe në Reçak, duke vlerësuar këtë pikë kthese tha se Kosova sot është demokracia më e suksesshme në Evropë.
“Supozoj që shumë prej jush këtu jeni mbi moshën 35-vjeçare, hajde të themi mbi 30, dhe ju mund ta kujtoni si ka qenë jeta në Kosovë para viteve ’98-’99. Dhe ja ku jem sot duke jetuar në Kosovë që është pabesueshëm më ndryshe nga ai realiteti para viteve ’98-’99. Kosova është demokracia më funksionale në Evropë, dhe këtë kuptim e ka marrë për të kjo masakër 25 vjet pasi ka ngjarë, sepse ajo kishte shërbyer si pikë kthese për Kosovën,” tha Ambasadori William Walker duke e vlerësuar Kosovën si tregim të pabesueshëm suksesi.
“Sipas mendimit tim, është demokracia më e suksesshme në Evropë. Liri e shprehjes, liri e shtypit, liri e feve. Për cilëndo liri të flisni, ato janë të pranishme sot në Kosovë . Ky është një shtet i ri që në pak vite ka arritur të shndërrohet në një demokraci të vërtetë dhe funksionale. Pra kjo është ajo se çfarë Reçaku do të thotë për mua – tranzicioni nga ajo që kishte ekzistuar këtu, nga ajo se si ishte jeta këtu për shqiptarët që jetonin në Kosovë atëkohë dhe se çfarë do të thotë jeta për shqiptarët e Kosovës sot.”
Ndryshe, pas homazheve në Kompleksin Memorial në Reçak, krerët e institucioneve të Kosovës, Presidentja Vjosa Osmani, Kryetari i Parlamentit Glauk Konjufca dhe Kryeministri Albin Kurti morën pjesë në ceremoninë përkujtimore në 25-vjetorin e Masakrës së Reçakut.
Më 15 janar të vitit 1999, në Reçak forcat serbe vranë 45 civilë shqiptarë. Ish-shefi i Misionit Verifikues të OSBE për Kosovën, William Walker, masakrën e Reçakut e kishte quajtur – Krim kundër njerëzimit!
Ndonëse kjo masakër në Reçak u organizua dhe u krye nga forcat policore, ushtarake dhe paraushtarake serbe, edhe sot Serbia jo vetëm që nuk e pranon këtë krim makabër, por në çdo dalje publike të krerëve të këtij shteti kriminal kur flasin për Kosovën, e quajnë trillim!
