26 vjet nga masakra, Osmani: Krusha e Vogël nuk është vetëm dhimbje, por simbol i zgjuarjes!
Në tubimin përkujtimor me rastin e 26 vjetorit të Masakrës në Krushë të Vogël, Presidentja e Kosovës, Vjosa Osmani, tha se një fshat i tërë u kthye në një varrezë, në vendin ku 26 vite më parë, Kryeministri Albin Kurti tha forcat policore ushtarake të Serbisë kryen mizoritë më ç’njerëzore .
“Më 1999 ndodhi një nga mizoritë gjenocidale të Serbisë. Për dy ditë u masakruan 113 martirë. Një fshat i tërë u kthye në një varrezë dhe forcat serbe nuk u ndalën vetëm me vrasje, por edhe i dogjën trupat. Serbia dëshmoi edhe një herë përpjekjen për ta fshirë popullin e Kosovës nga faqja e dheut. Krusha e Vogël nuk është vetëm dhimbje, por simbol i zgjuarjes dhe ku i shohim këta fëmijë, shumica prej tyre janë rritur pa prindër,” tha Vjosa Osmani duke shtuar se Krusha e Vogël nuk është vetëm vend i kujtesës, por edhe vend i së ardhmes sonë, jo për t’u hakmarrë, por për të mos u përsëritur më.
Kurti: Adresimi i krimeve të kryera nga Serbia, çështje urgjente
Kryeministri i Kosovës, Albin Kurti në përkujtimin e masakrës në Krushë të Vogël, tha se dëshmitë e krimeve të Serbisë në këtë vend janë të fuqishme, ndërkaq gjykimet e dënimet për këto krime janë të pakta e të mangëta.
“Prandaj është çështje urgjente adresimi i krimeve të kryera gjatë luftës, sepse përderisa këto krime nuk vjetrohen, dëshmitarët e këtyre mizorive vit pas viti, po plaken e po pakohen,” tha Kryeministri i Kosovës, Albin Kurti në vendin ku 26 vite më parë forcat policore ushtarake të Serbisë kryen mizoritë më ç’njerëzore ndërsa përfundoi:
“Jemi dëshmitarë të asaj kohe të tmerrshme lufte, kur Serbia pushtuese armike kreu krime lufte, krime kundër njerëzimit e gjenocid mbi ne shqiptarët e Kosovës. Madje edhe aktivistë të të drejtave të njeriut në Beograd, si serbja, Natasha Kandiç, e kanë quajtur krimin në Krushë të Vogël, gjenocid.”
Ndryshe, më 25, 26 e 27 mars të vitit 1999, në fshatin Krushë të Rahovecit janë masakruar 243 persona, përfshirë burra, gra, pleq e fëmijë. Kjo masakër konsiderohet si një nga masakrat më të mëdha gjatë luftës në Kosovë.
