27 Prilli, krerët e shtetit të Kosovës nderojnë të zhdukurit

Lliria e Kosovës do të ketë kuptim vetëm atëherë kur fati i 1600 të zhdukurve zbardhet tha Presidentja Vjosa Osmani, pasi me kryetarin e Parlamentit, Glauk Konjufca dhe kryeministrin Albin Kurti kanë bërë homazhe te memoriali për të zhdukurit pranë Kuvendit të Kosovës me rastin e 27 Prillit, Ditës Kombëtare për Persona të Zhdukur në Kosovë.

Presidentja e Kosovës tha se kërkesa parësore e institucioneve të Kosovës do të jetë zbardhja e fatit të zhdukurve me dhunë.

“Sot gjithë Republika e Kosovës bashkndien me familjaret e 1600 personave të zhdukur me dhunë. Fati i Kosovës është i lidhur drejtpërdrejt me fatin e 1.600 familjarëve tanë. Kjo asnjëherë s’do jetë barrë e tyre, s’është e familjeve, është e jona, janë njerëzit, ata janë të të gjithë Kosovës, edhe barrën e kemi të përbashkët,” tha Vjosa Osmani duke shtuar se do të bëjnë çmos për të siguruar drejtësi ndaj krimeve të Serbisë në Kosovë dhe zbardhjen e fatit të të pagjeturve. 

“Në Kosovë liria do të ketë kuptim vetëm atë ditë kur të kthen njerëzit tanë, a ë ditë kur plaga e atyre familajërëve që është edhe e jona do të mbyllet, apo do të fillojë të shërohet. Kërkesa jonë parësore themelore do të jetë zbardhja e fatit të zhdukurve”, tha Presidentja e Kosovës, Vjosa Osmani, duke i rikujtuar aleatëve:

“Për Kosovën s’ka gjë më të rëndësishme sesa zbardhja e fatit të zhdukurve me dhunë!”

Ndërsa Kryeministri i Kosovës, Albin Kurti, tha se janë zotuar së bashku me presidenten e kryetarin e Parlamentit, që do të bëjnë krejt çfarë munden e çfarë dinë për zbardhjen e fatit të zhdukurve.

“Gjenocidi  është e vërteta e Serbisë, si shtet duhet që ekzekutoret dhe urdhënsit  të dënohen. Kjo është një plagë që nuk e mbyll kalimi kohës. Si Kryeministër i Republikës, bashkë me Presidenten, e Kryetarin e Kuvendit jemi zotuar se do të bëjmë çka mundemi e dimë, por natyrisht që do të ndihmojmë për sjelljen e drejtësisë dhe sjelljen e së vërtetës. E vërteta është përpjekur të varroset në Batajnicë, fusha, male, liqene, por ju e dini se ajo u rishfaq,” tha Kurti duke shprehur mirënjohje për familjarët  që nuk e ndalën aktivitetin e tyre për fatin e të zhdukurve.

”Në raport me Serbinë, e për hir të së ardhmes tonë, ne duhet të bëhemi bashkë dhe ta kërkojmë përgjegjësinë duke qenë përgjegjës edhe në institucionet tona dhe në secilën pozitë që mbajmë. Iu jam mirënjohës familjeve që kurrë nuk ndalën aktivitetin e tyre, nëpër protesta, në vapë e acar, me lot në sy, në kërkim të më të dashurve të tyre.”

Ndryshe, krerët e shtetit ishin të shoqëruar nga përfaqësuesit e familjarëve, Bajram Qerkini nga Shoqata e të Pagjeturve dhe Kryetari i Këshillit koordinues për të pagjeturit, Ahmet Grajqevci.