3 vjet Reformë në Drejtësi/ Basha në Lezhë: Drejtësia është privatizuar nga Edi Rama!
Në 3 vjetorin e Reformës në Drejtësi, Kryetari i Partisë Demokratike, Lulzim Basha, gjatë një takimi me strukutrat e PD në Lezhë tha se Drejtësia është privatizuar tërësisht nga Edi Rama dhe kjo është arsyeja pse drejtësia nuk funksionon.
Duke iu referuar skandalit të Gjykatës së Durrësit, e cila sipas tij, me kërkesën e dyshes Rama-Dako ndryshoi në mënyrë të paprecedentë, vendimin e saj të mëparshëm për pavlefshmërinë e mandatit të prodhuar nga 30 qershori, Lulzim Basha konstaton:
“Kjo tregon se drejtësia është tërësisht e privatizuar nga Edi Rama. 3 vjet pas miratimit të reformës në drejtësi, drejtësia është tërësisht e kapur nga Rama. Kjo është arsyeja pse drejtësia nuk funksionon.”
Për liderin e opozitës, Edi Rama është kryeministri më hajdut në historinë e Shqipërisë:
“Edi Rama është kryeministri më hajdut, më arrogant, dhe më mashtrues në historinë e Shqipërisë. Paratë tuaja, paratë e shqiptarëve po i vjedh Edi Rama me familjen dhe miqtë e tij. Pasurohen të pushtetshmit dhe të pasurit, varfërohen njerëzit e thjeshtë dhe të pambrojtur. Nëse shqiptarët nuk kanë të hanë është sepse paratë e tyre i ka vjedhur Edi Rama. Miliarda euro janë vjedhur, abuzuar dhe shpërdoruar këto 6 vjet, të gjitha kanë përfunduar në xhepat e Ramës dhe janë shpërdoruar për tekat e Ramës në lluks dhe fasada.”
I pashmangshëm në këtë diskutim ishte koncesioni kriminal Milot-Balldren, të cilin Basha e cilësoi kusari, papunësi dhe vrasje të shpresës:
“Nëse shqiptarët janë pa punë, është sepse ekonominë, paratë dhe mundësitë ekonomike i kanë marrë oligarkët dhe klientët e Ramës. Nëse shqiptarët nuk kanë shpresa është sepse shpresat e tyre i ka vrarë Rama me oligarkët hajdutë, siç po bën edhe këtu në Lezhë me kusarinë Milot Balldren.”
Çdo gjë që ka premtuar Edi Rama, tha Kryetari i Partisë Demokratike, ka qenë mashtrim me qëllim për të vjedhur:
“Edi Rama është artist i mashtrimit. Çdo gjë që ka premtuar, çdo gjë që ka thënë, ka qenë mashtrim me qëllim për të vjedhur. Çdo projekt, program dhe politikë është mashtrim për shqiptarët në shërbim të oligarkëve.”
Avancimi i objektivit madhor të PD, tha Kryetari Lulzim Basha para strukturave të Partisë Demokratike në Lezhë, është që përmes zgjedhjeve të lira e të ndershme, të shndërrohet nga shumica morale e vendit në shumicë qeverisëse.
“30 qershori, në këtë pikëpamje vetëm ka përforcuar dhe konfirmuar si të drejta shqetësimet dhe rrugëdaljet nga kriza që kemi parashtruar: një qeveri tranzitore pa Edi Ramën, çuarjen para drejtësisë të të gjithë politikanëve dhe kriminelëve, të faktuar para të gjithë botës si hajdutët e zgjedhjeve, dhe zgjedhje të parakohshme.”
