30 vite nga eksodi biblik, Basha: Sot shqiptarët sërish po ikin masivisht nga keqqeverisja që na mban larg Europës!

Duke kujtuar eksodin biblik të shqiptarëve të 30 viteve më parë, Kryetari i Partisë Demokratike, Lulzim Basha, konstaton se sot 30 vite më pas shqiptarët sërish po ikin masivisht nga keqqeverisja e Edi Ramës që na mban larg Europës.

“30 vite më parë eksodi biblik i shqiptarëve drejt Italisë, shembi njëherë e përgjithmonë murin ndarës mes Shqipërisë dhe Europës. 30 vite më pas, sërish shqiptarët po ikin masivisht nga keqqeverisja që na mban larg Europës dhe nga pamundësia për të ndërtuar jetën në vendin e tyre,” shprehet Lulzim Basha përmes një mesazhi në rrjetin social Facebook duke e shoqëruar dhe me një video ndërsa përfundon:

“Ne do ta shërojmë këtë plagë dhe, siç u mundësuam shqiptarëve të lëvizin pa viza, do t’i japim çdo familjeje shqiptare shpresë dhe mundësi për një jetë më të mirë, një Shqipëri si gjithë Europa.”