30 vite pas rrëzimit të bustit të Enverit, Basha: Komunizmi godet “Shqipërinë si gjithë Europa”

Duke përkujtuar rrëzimin e shtatores së diktatorit më të pashpirt që ka parë historia shqiptare, Kryetari i Partisë Demokratike, Lulzim Basha, thekson se për fat të keq, në Shqipërinë tonë edhe 30 vite pas rrëzimit të bustit të diktatorit, simbolet e komunizmit dhe krimeve të atij regjimi janë rikthyer në rrugët dhe sheshet tona, për të trembur përpjekjen tonë tridekadëshe për ta bërë Shqipërinë si gjithë Europa.

“Jo vetëm nostalgjikët e viteve të mbrapshta e të zymta të diktaturës, por edhe të tjerë që për të mbajtur me çdo kusht pushtetin imitojnë diktatorin, janë sot kërcënimi më i madh për demokracinë dhe lirinë tonë,” konstaton Lulzim Basha duke u zotuar se PD do ta ndal këtë vërshim ogurzi duke e rikthyer Shqipërinë në rrugën e saj europiane.

“Unë ju garantoj se me vullnetin tim, angazhimin dhe mësimin edhe nga gabimet e së shkuarës do të përpiqem fort që as edhe hijet më të largëta të asaj kohë famëkeqe të mos jenë prezente në ditët tona,” thekson kryetari i Partisë Demokratike, Lulzim Basha, në mesazhin e tij përmes rrjetit social Facebook me rastin e 30 vjetorit e rrëzimit të bustit të diktatorit Enver Hoxha, duke e konsideruar 20 shkurtin si festë të çlirimit shpirtëror nga damka e turpshme e diktaturës ndërsa uron që të jetë dhe dita e besëlidhjes për të mos e lejuar kurrë më rikthimin e hijeve të saj mes nesh!

Ndryshe, më 20 shkurt 1991, me rënien e bustit të Enver Hoxhës shënohet dhe fundi i diktaturës në Shqipëri. Rrëzimi i bustit të diktatorit Enver Hoxha u nxit nga greva e urisë e cila u inicua nga qindra studentë për t’i hequr universitetin emrin e tij.

20 shkurti është shpallur Dita e Kujtesës kombëtare për Martirët dhe Viktimat e regjimit komunist.

Mesazhi:

30 vjet më parë, shqiptarët rrëzuan shtatoren e diktatorit më të pashpirt që ka parë historia jonë, në një akt sublim çlirimi nga idhujtaria e diktaturës.

20 shkurti i vitit 1991 ishte kremtim i shpresës së re dhe ndryshimit që po lindte pas gjysmë shekulli tiranie. Ishte klithma e shqiptarëve të lirë në shpirt që kumboi pa pushim në thirrjet “E duam Shqipërinë si gjithë Europa!”

Për fat të keq, në Shqipërinë tonë edhe 30 vite pas rrëzimit të bustit të diktatorit, simbolet e komunizmit dhe krimeve të atij regjimi janë rikthyer në rrugët dhe sheshet tona, për të trembur përpjekjen tonë tridekadëshe për ta bërë Shqipërinë si gjithë Europa.

Jo vetëm nostalgjikët e viteve të mbrapshta e të zymta të diktaturës, por edhe të tjerë që për të mbajtur me çdo kusht pushtetin imitojnë diktatorin, janë sot kërcënimi më i madh për demokracinë dhe lirinë tonë.

Ne do ta ndalim këtë vërshim ogurzi duke e rikthyer Shqipërinë në rrugën e saj europiane. Shqipëria ka nevojë për ekonomi më të fortë, për shëndetësi dhe kujdes më të madh për gjithë qytetarët, por historia jonë e afërt na ka mësuar se asnjëra nga këto nuk mund të arrihet pa garantuar mbi të gjitha lirinë dhe demokracinë për t’u sjellë si një vend europian.

Unë ju garantoj se me vullnetin tim, angazhimin dhe mësimin edhe nga gabimet e së shkuarës do të përpiqem fort që as edhe hijet më të largëta të asaj kohë famëkeqe të mos jenë prezente në ditët tona.

20 shkurti është festa jonë e çlirimit shpirtëror nga damka e turpshme e diktaturës! Le të jetë edhe dita e besëlidhjes për të mos e lejuar kurrë më rikthimin e hijeve të saj mes nesh!