30 vjet nga Pajtimi i Gjaqeve te Verrat e Llukës
Sot bëhen 30 vjet nga ngjarja e madhe e faljes së gjaqeve në Verrat e Llukës.
Më 1 Maj 1990, mbi 500 mijë shqiptarë, nga të gjitha hapësirat shqiptare, u tubuan me iniciativën e rinisë shqiptare, të pasuar nga intelektualët të prirë nga Prof.Anton Çetta, për Pajtimin e Gjaqeve, me ç‘rast u falën më shumë se 100 gjaqe dhe ngatërresa ndërshqiptare.
Ky tubim në Fshatin Llukë të Epërme të Komunës së Deçanit, përveç se ishte vijimësi e aksionit për pajtimin e familjeve shqiptare në hasmëri i cili kishte filluar më 2 shkurt 1990 në Lumëbardhë të Deçanit, ndikoi edhe në bashkimin e shqiptarëve dhe lëvizjen e mëvonshme për liri, demokraci dhe pavarësi.
Ndryshe, në vitin 2017, Ministria e Kulturës, Rinisë dhe Sportit, ka vendosur të përfshijë “Verrat e Llukës” në Listën e Trashëgimisë Kulturore për Mbrojtje të Përkohshme.
Kjo mbrojtje u arsyetua se “Verrat e Llukës” karakterizohen për vlerat historike, shoqërore dhe shpirtërore, si vendndodhje historike në kuadër të kategorisë Peizazhe Kulturore.
Në këtë vend janë zhvilluar shumë ngjarje historike, që nga viti 1900 deri në vitin 1910, aty u mblodhën shqiptarët për të luftuar kundër pushtuesit osman. Po ashtu, ky vend njihet për “Kuvendin e Verrave të Llukës”, “Besëlidhja e Madhe Shqiptare të Verrave të Llukës”, ndërsa historiku i Verrave të Llukës kulmoi me 1 maj 1990, ku u zhvillua tubimi madhështor i faljes së mbi 100 gjaqeve dhe ngatërresa ndërshqiptare në praninë e mbi 500 mijë shqiptarëve.
