30-vjetori i marrëdhënieve SHBA-Shqipëri, Kim: Kur amerikanët dhe shqiptarët bashkojnë forcat…
Asgjë nuk është e pamundur kur amerikanët dhe shqiptarët bashkojnë forcat! Kështu u shpreh Ambasadorja e SHBA në Tiranë, Yuri Kim, në 30 vjetorin e rivendosjes së marrëdhënieve diplomatike SHBA-Shqipëri duke risjellë mesazhin që përcollën me ngritjen e flamurit amerikan në vitin 1991, Chris Hill dhe Andromaqi Adami.
“Me ngritjen e flamurit amerikan atë ditë në 1991, Chris Hill dhe Andromaqi Adami përcollën mesazhe të fuqishme. Si një diplomat amerikan dhe e veja e dikujt i cili u vra sepse mbrojti Ambasadën Amerikane, kur ata të dy ngritën flamurin, ata përcollën mesazhin se asnjë dënim, asnjë pengesë, asnjë gënjeshtër nuk mund ta shuajë dëshirën për të qenë të lirë,” u shpreh Ambasadorja Yuri Kim në pritjen e 30 Vjetorit të rivendosjes së Marrëdhënieve Diplomatike midis Shteteve të Bashkuara dhe Shqipërisë duke shtuar:
“Ata përcollën mesazhin se asgjë nuk është e pamundur kur amerikanët dhe shqiptarët bashkojnë forcat. Dhe ata po përcillnin mesazhin se populli shqiptar dhe populli amerikan janë partnerë dhe miq të përjetshëm në rrugën drejt demokracisë dhe çdo qëllimi fisnik që dallon njerëzit e lirë nga ata jo të lirë!”
Pra, le të mendojmë mbi të kaluarën, le të mendojmë gjithnjë për të ardhmen dhe le t’i përkushtojmë vetët tona ndaj detyrës, tha në fjalën e saj Ambasadorja e Shteteve të Bashkuara në Tiranë, Yuri Kim, duke përfunduar:
“Për ta bërë këtë miqësi, këtë partneritet, këtë aleancë, më të fortën, më të mirën dhe më madhështoren që ka ekzistuar ndonjëherë. Dhe le të vazhdojmë duke ecur përpara së bashku, drejt së ardhmes – krah për krah.”
Ndryshe, në nder të Ambasadorit William Ryerson, angazhimi i palëkundur i të cilit, tha Ambasadorja Yuri Kim, për të ushqyer demokracinë në Shqipëri, dashuria e tij e vërtetë dhe e thellë për popullin e këtij vendi dhe vendosmëria e tij për të ndërtuar marrëdhëniet SHBA-Shqipëri, ka qenë një model për çdo diplomat amerikan që nga viti 1991, rezidenca zyrtare e Ambasadorit Amerikan në Shqipëri do të njihet si “Shtëpia Ryerson”.
