32 vite më parë/ Flamur Hoxha, Havzi Nela: Komunizmi është e keqja e Shqipërisë!
“Gjaku me gjak nuk lahet se bahet një pellg tjetër gjaku që s’e lan e s’mundet me e la kurrë të parin!” citon biznesmeni i njohur dhe kandidati për deputet i Partisë Demokratike, Flamur Hoxha, këtë mesazh të fortë të poetit Havzi Nela, të cilin regjimi komunist e vari në litar 32 vite më parë, kur besonte se do të shembej diktatura komuniste dhe do të vinte demokracia.
“Mëngjesi i 10 gushtit 32 vite më parë Havzi Nelën e gjeti të varur në litar sepse ai nuk e donte diktaturën dhe regjimin komunist dhe deklaronte hapur, qartë, me zë në gjyq dhe në mjediset ku vuante burgun, se komunizmi dhe Enver Hoxha është e keqja e Shqipërisë,” thekson Flamur Hoxha duke kujtuar këtë ditë të zezë kur familjarët ngelën pa më të dashurin e tyre, letësia shqipe pa një penë të fortë ndërsa kombi pa një shqiptar të guximshëm.
Ndryshe, pas miratimit përfundimtar të dënimit me vdekje nga anëtarët e Presidiumit të Kuvendit Popullor të drejtuar nga Ramiz Alia, ku firmën vuri dhe i ati i kryeministrit aktual, Kristaq Rama, mëngjesin e 10 gushtit Havzi Nela u ekzekutua me varje në mes të qytetit të Kukësit me akuzën e tradhtisë së lartë ndaj atdheut.
Në vitin 2018, Bashkia Kukës me ndihmën financiare të biznesmenit Flamur Hoxha, vendosi bustin e Havzi Nelës në oborrin e gjimnazit që mbanë emrin e tij dhe rindërtoi shtëpinë muze në fshatin e lindjes, Kollovoz.
Pas disa botimeve kushtuar Havzi Neles jo rastësisht është sipërmarrësi Flamur Hoxha. Idealet e përbashkëta, e dhimbjet e ngjashme, e rrisin ndjenjën e përgjegjësisë për të mbështetur, a për t’u dhënë dorë: kauzës e idealeve.
Rexhep Shahu, Kryeredaktor i Klubit të Poezisë tregon se, “humanisti Flamur Hoxha ka financuar botimet e munguara të poetit Havzi Nela. Këtu përfshihet vepra e plotë e tij me 5548 vargje të panjohura në masën 80 përqind. Libri “Shkrimtarët për Havzi Nelën – Shpirti i lirë i Lumës”, shkruar posaçërisht nga mbi 50 shkrimtarë dhe numri special 14 i revistës Illz, revistë letrare e Tiranës me 500 faqe, kushtuar shkrimtarëve martirë në 30-vjetorin e varjes së Havziut.
