35 vjetori i Masakrës 2 Prillit, Berisha: Sakrifica e martirëve të votës së lirë, sot më aktuale se kurrë
Në 35 vjetorin e Masakrës së 2 Prillit, Kryetari i Partisë Demokratike, Sali Berisha, nga Shkodra tha se 2 Prilli nisi si revoltë ndaj farsës elektorale ku martirët nderuan votën e lirë dhe lirinë, dhe, sot, sakrifica e martirëve të votës së lirë është më aktuale se kurrë.
“Sot, në 35 vjetorin e martirizimit me 2 prill të vitit 1991 të katër bijve të shquar, qytetarëve shembullorë të këtij qyteti, ne përulemi me nderimin më të madh, me mirënjohjen më të pakufishme para veprës së Arben Brocit, themelues i PD dhe anëtar kryesie i kësaj partie, themelues i pluralizmit politik në Shqipëri, student shembullor, trim dhe guximtar.
Përulemi me nderimin më të madh para veprës së pavdekshme të Bujar Bishanakut, Nazmir Kryeziut, Besnik Cekës, qytetarë shembullorë, bij shembullorë të këtij qyteti, trima, guximtarë të cilët sakrifikuan jetën për vlerat më të arrira që ne besojmë.
Të dashur miq, 35 vite më parë, vetëm dy ditë pas përfundimit të farsës elektorale, gjimnazistët e Shkodrës ndërprenë mësimin dhe u ulën mbi çantat e tyre në një formë proteste ndër më të qytetëruara, ndër më paqësoret.
Ata protestuan në dëshpërim të thellë sepse diktatori i fundit komunist në Europë, partia e tij dhe zgjedhjet pluraliste pas pothuajse gjysmë shekulli, i shndërroi në një farsë zgjedhore.
Zhgënjimi i tyre ishte i jashtëzakonshëm dhe po kështu zemërimi dhe dëshpërimi.
Ndaj dhe ata dolën në një protestë, u ulën përballë pallatit të krimit, u ulën përballë selisë së partisë së krimit dhe mbi ta u shkrehën breshëri të shumta kallashnikovësh dhe mitrolozësh.
Ranë në këtë shesh për të mbetur përjetë të gjallë në zemrat tona, për t’u nderuar gjithmonë nga ata që nderojnë votën e lirë dhe lirinë,” tha Sali Berisha në këtë 35 vjetor duke theksuar se PD është e betuar se misioni i saj kryesor është rikthimi i votës së lirë tek shqiptarët.
“Sot pas 35 viteve, prindërit, familjarët e tyre e kanë të hapur plagën e rëndë të humbjes së tyre 35 vite më parë dhe asgjë atë plagë nuk mund ta mbyllë.
Por, duhet të jetë një ngushëllim për ta sepse martirizimi i tyre në këtë shesh 35 vite më parë u shndërrua në dritë, hapi rrugën që shqiptarët të votojnë të lirë.
Bëri të mundur që shqiptarët me votën e tyre të përmbysin regjimin më mizor që Europa kishte njohur pas luftës së dytë botërore.
Masakra e 2 Prillit pati një jehonë të jashtëzakonshme ndërkombëtare.
Kauza që mbrojtën Arben Broci, Nazmi Kryeziu, Bujar Beshanaku, Besnik Ceka, u bë një kauzë e njerëzve të lirë në mbarë botën. Në Kongresin e SHBA, në Parlamentin Europian, në Asamblenë e Këshillit të Europës, njëra pas tjetrës u miratuan rezoluta në nderim të martirëve të Shkodrës, të martirëve të 2 Prillit, në mbështetje të Shkodrës dhe të shqiptarëve që donin të çliroheshin nga diktatura komuniste.
Sot asgjë nuk mbyll plagën e hapur nga dora kriminale e diktaturës dhe vrasësve të saj 35 vite më parë.
Por sot ju siguroj se bijtë tuaj, bijtë e Shkodrës janë më të gjallë se kurrë në kujtimin tonë, në nderimin tonë.
Vepra e tyre është sot më frymëzuese se asnjëherë më parë, është kushtrim i vërtetë për të gjithë shqiptarët që të sakrifikojnë për votën e lirë.
Të dashur miq, 3 vite para se martirët e 2 Prillit të flijoheshin në këtë shesh dhe mbi 87 qytetarë të Shkodrës të plagoseshin në një masakër të vërtetë nga falangat e krimit, Ramiz Alia dhe Kristaq Rama, skulptori kriminel komunist, firmosnin varjen në litar të një poeti disident dhe varjen në publik si akt urrejtje ndaj tij sepse ai kishte shkruar vargje për Kosovën, sepse ai kishte shkruar vargje për liritë dhe të drejtat e qytetarëve, për dinjitetin e tyre. Vargjet për frymën e Helsinkit që shpresonte se do frynte në viset tona.
Sot, pas 35 vitesh në pushtet është bastardi i tij, është Edi Rama, i cili në shembullin më të zi të baballarëve të vet ka përqendruar çdo pushtet në duart e tij.
Përdor pushtetin për t’u pasuruar.
Përdor pushtetin për të legjitimuar vjedhjen, plaçkitjen e shqiptarëve, për të shndërruar votën në një farsë të shëmtuar.
Në këtë kuadër, kurrë më shumë se sot nuk është aktuale, nuk është më aktuale, më frymëzese, sakrifica e martirëve të 2 Prillit, martirëve të votës së lirë,” tha Kryetari i Partisë Demokratike, Sali Berisha, duke përfunduar:
“Ndaj dhe ne jemi të betuar, PD është e betuar se misioni i saj kryesor është rikthimi i votës së lirë tek shqiptarët.
Kam besim të madh se Shkodra do të përmbushë këtë mision më mirë, më me vendosmëri se çdo qytet tjetër i këtij vendi.”
Ndryshe, kanë kaluar 35 vjet demokraci shqiptare, por edhe 35 vjet ankth, akuza dhe kundërakuza, pabesi dhe dëshpërim për qytetarët e Shkodrës që vazhdojnë të kujtojnë ditën e terrorit komunist të 2 Prillit të vitit 1991, për të cilin vet regjimi komunist hetoi, gjykoi, por nuk e ka tha të vërtetën për vrasjen e 4 të rinjve, Arben Brocit, Bujar Bishanakut, Besnik Cekës dhe Nazmi Kryeziut, si dhe plagosjen e 78 qytetarëve të Shkodrës.
Ashtu siç e thonë vetë shkodranët, kjo masakër mund të jetë hakmarrje për meshën dhe lutjen e parë fetare në Shqipëri, përpjekjen për rrëzimin e bustit të Stalinit ose demonstratën e parë antikomuniste në kujtim të viktimave të kufirit shqiptar, por përveç kësaj, kjo masakër është edhe një gjakderdhje më shumë e komunistëve, regjimi i të cilëve kishte ditët e numëruara. Votën e popullit nuk e morën dot, por as pushtetin nuk po e dorëzonin dot.
