6 Marsi/ Me intelektualët, Berisha: Shfrytëzimi i potencialeve që Shkodra mishëron!

Në kuadër të fushatës për zgjedhjet e pjesshme vendore të 6 marsit, lideri historik i Partisë Demokratike, Sali Berisha me kandidatin e “Shtëpisë së Lirisë”, Bardh Spahia, zhvilloi një takim me intelektualët në Shkodër, ku u diskutua situata ekonomike politike e këtij qyteti dhe shfrytëzimi i potencialeve që Shkodra mishëron.

“Ju keni shumë mendime, ide dhe projekte, të cilat jam i interesuar t’i dëgjoj. Shkodra në çdo aspekt, zotëron një potencial të jashtëzakonshëm. Detyra më kryesore e atyre që qeverisin është se si të kontribuojnë në zhvillimin, shfrytëzimin e këtyre potencialeve që Shkodra mishëron, duke filluar nga shpirti i qytetarëve të saj deri te brigjet mahnitëse dhe deri te Alpet. Banorët e Shkodrës e meritojnë të kenë një jetesë shumë më të mirë nga kjo që kanë sot.

Ky është një moment i një rëndësie kritike, pasi pas 8 vitesh qeverisje socialiste, vendi u ndodh me një narko-shtet, këtë nuk e them unë, por analistët më seriozë të botës dhe me një pseudo-opozitë pasi kjo po faktohet për mbarë qytetarët. Kjo e dyta, në një aspekt është edhe më tragjike se e para. Qeveria mund të bëjë zgjedhjet e gabuara, të marrë vendimet e gabuara, por ajo gjithmonë duhet të përballet me një opozitë të vërtetë, që ngjall shpresë për të dalë nga situata,” tha Sali Berisha në takim me intelektualët në Shkodër ndërsa e la të hapur mundësinë e rikthimit të të gjithë atyre që kanë pasur kontribute në PD.

“Tetë vitet faktuan se opozita ishte më shumë në idealet e qytetarëve se në drejtimin e saj. Kjo periudhë merr fund. Ne që jemi këtu, jemi të vërtetë. Ne nuk pranojmë një filozofi të tillë. Ne nuk e pranojmë pseudo-pluralizmin,” tha lideri historik i PD ndërsa sqaroi angazhimin e shumë të përfolurit Arben Imami si drejtues i fushatës në Shkodër.

“Kam kënaqësi që fushatën këtu në Shkodër e udhëheq Arben Imami nga Tirana. Kërkesën për këtë e paraqitën nga këtu, nuk erdhi nga unë, pasi ai ka punuar në të kaluarën në Shkodër. Të gjithë ata që kanë kontribute, janë të mirëpritur dhe do rikthehen. Jozefina Topalli ka kontribute të pamohueshme,” tha lideri historik i PD, Sali Berisha, duke përfunduar:

“Ne jemi për hapjen e PD-së për të gjithë ata që kanë kontribute në parti. Sikundër jemi për hapjen e partisë për njerëzit e vlerave. Ne do nxjerrim në plan të parë rininë. Ky do jetë një qëllim tjetër ynë pasi ajo po ikën.”