6 Tetori i gjithë shqiptarëve

nga Hysamedin Feraj

Kosova kryen zgjedhjet e saj legjislative të parakohshme më 6 tetor 2019. Këto zgjedhje janë vendimtare jo vetëm për mirëqenien e atyre që kanë të drejtë vote, por për mbarë kombin. Shqiptarët që kanë të drejtën e votës në Kosovë kanë veçse fatin e mirë me pasë përgjegjësi për gjithë universin shqiptar. Prandaj sot ata janë votues universal dhe jo individë e as krahinari e zvetënuar. Këtë fat, që është njëkohësisht barrë historike, qytetarët e kryejnë me nder, moral e me përfitim politik, ekonomik dhe social duke sjell shpresën për shqiptarët përmes fitores së Lëvizjes VETËVENDOSJE! Në rrugën drejt fitores së kësaj shprese, kanë mbështetjen e shqiptarëve nga të gjitha trevat e nga mërgata.

Zgjedhjet janë mënyra e shpëtimit të Kosovës prej korrupsionit, kësaj sëmundjeje të gjatë e të trashëgueshme prej një qeverie në një tjetër. Sepse mënyra se si u ndërtuan qeveritë deri tanimë në Kosovë, ka qenë e tillë që çdo korrupsion zëvendësohej nga një më i lartë. E tillë ishte qeveria Haradinaj, përzierje klanesh në korrupsion nominal dhe substancial.

Kur korrupsioni është masiv dhe sistematik, kur militantët janë militantë të punësimit fiktiv dhe korruptimit aktiv, atëherë korrupsioni i përgjithësuar e merr peng shtetin me një hordhi pesë zv-kryeministrash, mbi tetëdhjetë zv-ministra dhe një taborr këshilltarësh që nuk i vlejnë kujt. Korrupsioni nominal u bë i mundur kur një parti e dorës së tretë u gëlltit prej dorës së ndyrë, PDK-së. Korrupsioni substacial ia nisi me numrin e zv-ministrave që duhej të emëroheshin për me mbajtë në ekulibrin e brishtë partitë e sprovuara të krimit, PDK-në, si dhe partinë e Vuçiçit, Listën Srpska.

Sa më i brishtë dhe produkt kulisash të jetë ekulibri i një qeverie, aq më i kërcënuar është funksioni i shtetit. Qeveria e natës ia nisi me një tjetër korrupsion substancial, atë të rritjes së pagave të vetvetes. Vijoi me një krim tjetër, atë mbi tërësinë territoriale me dhënien e tokave shqiptare Malit të Zi, me krimin në rrafshin e të drejtave të njeriut, rrëmbimin dhe dëbimin e gjashtë qytetarëve turq – kryeministri deklaroi se nuk dinte gjë – dhe me krime ekonomike e financiare. Koalicioni i dobët mes të korruptuarve, sado pak të mbajë pushtetin, e rrënon në masa të hatashme shtetin në sovranitet, në të drejta njerëzore, në ekonomi dhe financë. Dhe rezultati është largimi i shqiptarëve nga trojet e tyre për një jetë të paqartë kudo që të jetë e mundur.

As liberalizim vizash, as prodhim, por vetëm liberalizim i korrupsionit dhe i njerëzve. Me qeverinë Haradinaj u mbush cikli i korruptimit. Ndaj dhe 6 tetori nuk është një datë e zakonshme.

Mbas dekadash të rrokullisjes së shoqërisë kah humnera në Kosovë, në Shqipëri, në Maqedoninë e Veriut, dhe kudo tjetër, mundemi të themi: Ndal! Mund ta ndalim rënien e mëtejshme, thjesht duke mos i votuar të gjithë ata që kanë qenë në pushtet deri sot. Mund t’i ndalim thjesht duke mos i votuar ata që pushtetin e dhënë disa herë në mirëbesim e përdorën për korruptimin e dinjitetit shqiptar në botë, ata që sa herë iu dha vota e pushteti, këtë e lexuan si leje për korrupsion, dhe secilën herë morën më shumë guxim të na shkatërrojnë më shumë.

Këto janë zgjedhjet me përgjegjësinë më të madhe, por edhe më të lehtën për ta kryer detyrën si duhet. Sepse nuk ka shumë alternativa zgjedhjeje, sepse ajo që ndalon rënien e mëtejshme dhe fillon ngritjen e rimëkëmbjen shqiptare është Lëvizja. Fillimi i tetorit është sezon i mirë me mbjellë, për me korrë frytin e bollshëm shpejt në pranverë.

Qendra e Lëvizjes Vetëvendosje në Shqipëri mobilizohet tërësisht në gjallërimin e fushatës zgjedhore. Suksese Kosovës! Suksese shqiptarëve!