“7 policë të plagosur”, Lleshaj: Sulm me molotov; Infermierja: Probleme nga gazi lotsjellës!
Pas përplasjes së një nate më parë në KZAZ-në numër 19 në qytetin e Peshkopisë, policia raportoi për 7 punonjës policie të plagosur ndërsa Ministri i Brendshëm, Ish-Gjeneral Sandër Lleshaj duke reaguar përmes rrjetit social “Twitter” tha se verbëria e dhunës politike po sulmon sot me molotov KZAZ e vendosur në shkollën “Nazmi Rushiti” dhe policinë në Dibër.
Por, sot, dëshmia e inferemieres e cila ka pranuar 7 policët e plagosur në spitalin e Peshkopisë tregon se nuk bëhet fjalë për policë të plagosur por thjesht kishin probleme për shkak të gazit të hedhur prej tyre.
“Në spital janë paraqitur nëntë raste. 7 janë policë, një operator dhe një protestues. Kanë pasur komplikacione nga gazi lotsjellës. Nga këto që kanë ardhur në urgjencë asnjë prej tyre nuk ka qenë i plagosur, por veç intoksikim nga gazi lotsjellës,” thotë infermierja e spitalit të Peshkopisë.
Pas kësaj deklarate reagon Partia Demokratike duke theksuar se dëshmia e infermieres rrëzon propagandën e policisë politike të Edi Ramës.
“Dëshmia e infermieres në Dibër rrëzon propagandën e policisë politike të Edi Rames, se ne Dibër u plagosen 7 police. Zonja pohon se te 7 policet kane patur komplikacione nga gazi lotsjellës, që kanë hedhur kolegët e tyre. Dëshmia provon se qytetaret ne Dibër nuk kane plagosur as një polic te vetëm, siç u tha mbrëmë nga policia, e cila, po provohet se është kthyer në një vegël të mjerë politike të regjimit te Edi Ramës.”
Ndryshe, pas përplasjeve dhe dhunës para KZAZ numër 19 në Dibër, policia vendore ka arrestuar 12 persona dhe ka shpallur në kerkim 39 të tjerë. Policia i akuzon ata si të dyshuar për sulmin ndaj KZAZ nr. 19, në qytetin e Peshkopisë.
