7 shërbime me COVID-19, PD: Zinxhiri i infeksionit duhet këputur në QSUT!

Pas kthimit të Qendrës Spitalore Universitare në Tiranë në një vatër të përhapjes së COVID-19, Partia Demokratike përmes Ish-Deputetit Dr.Bardh Spahia duke akuzuar Ministren e Shëndetësisë si përgjegjëse për shkak të keqmenaxhimit të situatës së krijuar, i kërkon të këpus zinxhirin e infeksionit në QSUT.

“I uroj shërim të shpejtë kolegut hematolog që po lufton me Covid-19 në spitalin infektiv. U shpreh solidaritetin të gjithë anëtarëve të personelit shëndetësor, që punon në kushte pasigurie nga infektimi me virusin Korona. Nëse kolegët duhet të rrisin vëmendjen në të përditshmen e tyre, ministrja e shëndetësisë duhet t’u përgjigjet kërkesave të tyre për testime, sepse ka shumë denoncime nga kolegë si në strukturat publike, edhe ato private që nuk u vihet veshi,” tha Dr.Bardh Spahia duek shtuar se bërja e tamponëve si qokë është skandaloze dhe kriminale, sepse injorimi i personave të infektuar, ndihmon në përhapjen e virusit.

“Nuk mund të kursehen tamponët për ata që kanë nevojë! Është kriminale se si akoma sot, 4 muaj mbas fillimit te emergjences është zero investimi për rritjen e kapaciteteve testuese, asnjë investim për një laborator të ri, asnjë investim për sigurimin e numrit të mjaftueshëm të testeve, asnjë investim për garantimin e mjeteve mbrojtëse për mjekët apo sigurimin e maskave të mjaftueshme për qytetarët shqiptarë.”

Me 7 shërbime të infektuara, QSUT është kthyer në një vatër të nxehtë përhapje të virusit dhe përgjegjës nuk janë qytetarët, por vetë Ministria e Shëndetësisë që po menaxhon këtë situatë, kreut të së cilës, Ogerta Manastirliut, i kërkoj që të këpus zinxhirin e infeksionit:

“Reagoni zonja ministre, merrni masat që të këpusni zinxhirin e infeksionit në QSUT, sepse është i pafalshëm infektimi i personelit mjekësor, por edhe i pacientëve në një strukturë shëndetësore publike!”