8 Marsi, Kryeministri i Kosov: Synimi ynë për barazi dhe drejtësi nuk ka alternativë!
Kryeministri i Kosovës Albin Kurti, në hapjen e konferencës së organizuar nga Agjencia për Barazi Gjinore, në shënimin e Ditës Ndërkombëtare të Grave, tha se synimi ynë për barazi e drejtësi nuk ka alternativë.
“Politikat feministe po e ruajnë dhe po e përparojnë demokracinë. Ato e kanë fituar luftën politike, tashmë më nuk ka dyshime se këto dyja mund të ecin bashkë, ky është shteti që po punojmë për çdo ditë,” tha Albin Kurti duke përmendur me këtë rast skemat ku janë përfituese gratë e Kosovës ndërsa ka përmendur edhe mbi 90 mijë gra që për herë të parë kanë hapur llogari bankare.
Ndërkohë Presidentja Vjosa Osmani, në Ditën Ndërkombëtare të Gruas, ka kujtuar përmes një reagimi në rrjtin social Facebook, ato gra e vajza që nuk janë më në mesin tonë, e të cilat u shndërruan në simbol rezistence, lufte dhe angazhimi për liri e barazi.
Osmani në një postim në Facebook, ka shkruar se forca, qëndrueshmëria dhe zelli i tyre për emancipim, zhvillim e barazi qëndron fort në themelet e Republikës sonë.
“Në Ditën Ndërkombëtare të Gruas shënojmë arritjet e grave dhe vajzave dhe përpjekjet e jashtëzakonshme të tyre në Kosovë dhe kudo në botë për të drejta të barabarta. Sot kujtojmë dhe të gjitha ato gra e vajza që nuk janë më në mesin tonë, e të cilat u shndërruan në simbol rezistence, lufte dhe angazhimi për liri e barazi,” thekson Presidentja e Kosovës, Vjosa Osmani, përmes rrjetit social Facebook duke përfunduar:
“Forca, qëndrueshmëria dhe zelli juaj i pashoq për emancipim të vazhdueshëm, zhvillim e barazi qëndron fort në themelet e Republikës sonë. Sot, nesër dhe çdo ditë, me ju dhe për ju!”
Ndryshe sot shënohet 8 Marsi – Dita Ndërkombëtare e Gruas, e njohur edhe si Dita e Nënës. Kjo ngjarje zë fill më 8 mars 1857, kur rrobalarëset e Nju Jorkut u ngritën në protestë për të drejtat e tyre kundër shtypjes e shfrytëzimit të egër që u bëhej atyre.
