A do të flejë Abazoviçi me mullixhiun?!
nga Agim Popoci
Rezultati i zgjedhjeve në Mal të Zi përveç se i dha fund epokës së Milo Gjukanoviçit dëshmoi edhe një herë, përkundër sforcimit të Brukselit, se sa e kriminalizuar dhe proserbe është shoqëria në këtë shtet i cili tashmë është në paradhomën e Bashkimit Evropian!
Shumë lehtë u pranua fundi i epokës së Milo Gjukanoviçit por risi nuk mund të jetë në asnjë mënyrë rikthimi i krimit serb në sofrën malazeze.
Sikur rezultati i këtyre zgjedhjeve të përkthehet me reflektim, atëherë të gjithë ata që refuzuan Milo Gjukanoviçin pse votuan serbët dhe jo viktimat e Gjukanoviçit, boshnjakët dhe kroatët, që kontribuuan në masë të madhe në krijimin e shtetit të Malit të Zi; Dhe pse jo, shqiptarët, edhe pse ç’është e vërteta Gjukanoviç nuk ishte në krah të Milosheviçit në luftën e Kosovës! Dhe jo vetëm kaq!
Serbët, sipas rezultatit të KQZ, morën 32.52 për qind të votave ndërkohë që bazuar në regjistrimin e fundit të popullsisë në Mal të Zi ka 28.7 për qind serbë! Nëse kemi parasysh se në regjistrimin e popullsisë kjo shifër është sforcuar me refugjatë serbë nga Kroacia dhe Bosnja, 4 për qind e malazezëve që votuan dje për koalicionin serb falë një angazhimi të pashembullt të mitropolitit të Kishës Ortodokse Serbe në Mal të Zi, Amfilohije, konfirmuan se më së miri u rri emërtimin “Për të ardhmen e Malit Zi nën Serbi”!
Por 14 vjet pavarësi, ky shtet prodhoi edhe një tjetër paradoks përveç se atij çetnik.
Tokën malazeze Milo Gjukanoviç e la në dispozicion të kriminelit Slobodan Milosheviç gjatë luftërave në Sloveni, Kroaci dhe Mal të Zi. Duke pasur parasysh luftën e shkurtë në Slloveni, gjakderdhjet që shkaktoi ushtria serbe në Kroaci dhe Bosnje, duke përdorur tokën malazeze, dje rezultoi se miratohen nga shumica e qytetarëve të Malit të Zi
Partia Boshnjake mori vetëm 3.81 për qind ndërsa sipas regjistrimit të popullsisë rezulton se boshnjak dhe mysliman janë 11.9 për qind; Ndërkohë popullsia kroate, sipas të dhënave zyrtare është 0.97 për qind por rezultati i zgjedhjeve dëshmon se kroatët kanë marrë vetëm 0.40 për qind të votave, përkatësisht, Iniciativa qytetare kroate – 0.27 për qind, dhe Partia reformiste kroate – 0.13 për qind ndonëse dihet se si mobilizohen pakicat në zgjedhje, si mënyrën e vetme për plotësimin e të drejtave të tyre.
Brukseli mund të harrojë refugjatët boshnjakë e kroatë që flinin rrugëve të Sanxhakut, Rozhajes, Plavës dhe Gucisë gjatë viteve ’90-të, por qytetarët e Malit të Zi në asnjë mënyrë. Ata nuk ishin thjeshtë refugjatë por njerëz të dëbuar nga shtëpitë e tyre nga Slobodan Milosheviçi që përkrahej edhe nga Milo Gjukanoviç. Nëse dje u “dënua” Gjukanoviç pse u dekorua Milosheviçi, shtrohet pyetja! Dhe, meqë firojnë votat ndër boshnjakë dhe kroatë, nuk ka boshnjak dhe kroat jo në Mal të Zi, po as në rruzullin tokësor që mund ta votoj politikën e Milosheviçit, pikërisht këtë politikë që promovon Kisha Ortodokse Serbe, Amfilohije përkatësisht Zdravko Krivokapiç me koalicionin “Për të ardhmen e Malit Zi”.
Në këtë kazan përfundon edhe koalicioni “Paqja është kombi ynë” i cili ka marrë 12.55 për qind të votave. Përkundër dëshirës së mirë që promovojnë dhe shprehen këta malazez kundër Milo Gjukanoviçit, krijimi i një qeverie që menaxhohet nga një prift kriminel si Amfilohije, e shndërron këtë koalicion në “Krimi është kombi ynë”, gjë që u konfirmua edhe pas rezultateve të para zgjedhore.
Në fund, në këtë maskaradë elektorale edhe shifrat e votave shqiptare shkaktojnë trishtim! Sipas regjistrimit të fundit të popullsisë në Mal të Zi janë 4.9 për qind shqiptar. Duke pasur parasysh moshën shumë të re që ka kombi shqiptarë edhe në këtë shtet që ca budallenj e quajnë edhe proevropian, nuk ka shqiptarë në botë që mund të pajtohet me 2.77 për qind të votave të marra, përkatësisht koalicioni shqiptar ”Bashkë nji za” listë të cilës i prin Fatmir Gjeka, dhe mori 4.675 ose 1.16 për qind dhe Lista Shqiptare Genci Nimanbegu – Nik Gjeloshaj të cilës i prin Nik Gjeloshaj dhe mori 6.485 vota ose 1.61 për qind të votave.
Nëse votat tjera i atribuohen Dritan Abazoviçit, atëherë problemi thellohet edhe më shumë, ndër shqiptarë dhe jo vetëm! Nëse Abazoviçi vërtetë mendon se e ardhmja e Malit të Zi është më e ndritur pa Milo Gjukanoviçin, ai mund të kontribuoi në këtë drejtim me shqiptarë, kroatë dhe boshnjakë që kanë shumë më shumë arsye se sa një serb i cili vetëm Malin e Zi dhe Kosovën nuk i do shtet të pavarur, pavarësisht rrethanave dhe lëvizjeve gjeopolitike!
Presidenti i URA, Dritan Abazoviç, mund të jetë zhgënjyer thellë përveç se me Gjukanoviçin edhe me liderët shqiptarë, por kjo nuk i jep atij të drejtë të bëjë qeveri me kriminelë serbë, aq më pak një koalicion të emërtuar serbisht: “Crno na Bijelo”!/Lexo shqip: “E zeza në të bardhë”/!
Ai ka siguruar se me Qeverinë e re të Malit të Zi, nuk ka për të pasur ndryshime të politikave të jashtme, dhe se do të bëjë koalicion vetëm me ata që janë të gatshëm të bëjnë sistemin e qeverisë së ekspertëve!
Kur dolën rezultate e para të zgjedhjeve, Dritan Abazoviçi, kishte detyrime dhe falënderim për votuesit por kjo nuk ndodhi me liderin e koalicionit “Për të ardhmen e Malit Zi”, Zdravko Krivokapiç. Ai shkoi dhe falënderoi mitropolitin Amfilohije sepse ishte kontributi i tij që i dha rezultatin zgjedhor; Ndërsa shqiptarët, boshnjakët dhe kroatët, duke përfshirë dhe Abazoviçin e dinë se kush është Amfilohije! Sikur ti marrim edhe të mirëqena të gjitha që ky klerik thotë për të Gjukanoviçin, tezat e tij për kroatët, boshnjakët dhe shqiptarët janë kriminale.
Pyetja është se për çfarë politike dhe qeverie me ekspertë flet Abazoviçi?! Koalicioni “Për të ardhmen e Malit Zi” është krijuar për të ardhmen e Malit të Zi nën Serbi, të kontrolluar nga Rusia, dhe nëse edhe këtë realitet ndër serbët që jetojnë në Mal të Zi do ta ndryshoi Abazoviçi, atëherë këtë problem e zgjidhë vetëm psikologu!
Ndërsa shqiptarët që kanë një thënie epike, që kokë e këmbë i përshtatet pozicionit në të cilin ndodhet Dritan Abazoviç, vetëm me pak fat nuk do ta shohin të jetësuar qëllimin e Presidentit të URA: “Për inat të vjehrrës flenë me mullixhiun”.
