A ka pasur llum në kohën e qeverisjes së PD? Basha: Pa diskutim që po! Një pjesë e kemi pastruar…

Sot pas shkarkimit të Flamur Nokës nga kreu i Nënkryetarit të Komisionit të Sigurisë, ndryshe nga dje kur me burime mediat që i referohen kreut të Partisë Demokratike publikuan debatin e zbardhur në Grupin Parlamentar, kryetari i PD, Lulzim Basha e tha qartë se fraza të dala indirekte si “llumi i PD-së” nga këto shkallë të PD i shërbejnë Edi Ramës dhe bëhen për të demoralizuar demokratët por pa diskutim që ka pasur llum në kohën e qeverisjes së PD!  

“Zoti Noka i kam komunikuar shkarkimin e tij nga detyra si nënkryetar i komisionit të sigurisë. Nuk e kam përjashtuar, por e kam paralajmëruar. Nuk mundet që PD që ka kundërshtar dhe armik, armikun e shqiptarëve Edi Ramën dhe regjimin e tij të mbahet peng nga sajesa, shpifje dhe keqinformime që na devijojnë nga detyra jonë kryesore si opozitë që është lufta ndaj këtij regjimi me të gjitha format dhe mënyrat. Ne kemi lançuar iniciativa të shumta opozita dhe do të lançojmë të tjera, për të zhbërë dhe gërryer themelet e regjimit Rama-Doshi-Rakipi dhe nuk mund të mbetemi peng i axhendave personale që kërkojnë ta kthejnë PD në një bunker për interesa personale të kujtdo qofshin këto. Prandaj shtrembërime të tilla nuk do të tolerohen.

PD nuk do të mbetet peng i interesave personale. Fraza të dala indirekte si “llumi i PD-së” nga këto shkallë të PD ,i shërbejnë Edi Ramës dhe bëhen për të demoralizuar demokratët.  Në datën 9 shtator kam marrë një vendim për të shmangur çdo mundësi përçarje që i shërben Edi Rama,” tha Lulzim Basha duke e pranuar se ende nuk ia ka dalë që të pastrojë llumin:

“Në 30 vjet ndërrohen qeveritë dhe këta vetëm pasurohen. Beteja ime dhe e PD-së është me ta dhe kërkohet fokus, vëmendje dhe guxim. A ka pasur llum në kohën e qeverisjes së PD? Pa diskutim që po. Një pjesë e kemi pastruar, një pjesë nuk ia kemi dalë dot ta pastrojmë. Njerëz që kanë kontrata me inceneratorët.”

Ndonëse u shpreh se ka shumë njerëz që janë të shantazhueshëm nga Edi Rama sepse pastrojnë paratë, emra nuk dha:

“Njerëz që hapin gropa sot në Tiranë për të pastruar paratë. Njerëz që kanë frikë nga gjëmat e tyre dhe janë të shantazhueshëm nga Edi Rama dhe janë shantazhuar nga Edi Rama për t’i shërbyer Edi Ramës. Këto para të vëna me praktika korruptive gjatë kohës që qeverisnim ne, i përdorin për të shantazhuar demokratët,” tha Kryetari i PD, Lulzim Basha duke theksuar se PD është shpresa e vetme:

“PD është shpresa e vetme e shqiptarëve për ndryshim. Ky është një moment fondamental i ndryshimit. Bishtat e korruptuar të ish-qeverisjes tonë, një pjesë e kemi pastruar por dhe një pjesë kanë mbetur, demokratët e dinë kush janë. Nuk do lejoj që askush t’i bjerë me shkelm sakrificës së demokratëve.”