A konsumoni djathë me yndyrë? Studimet konfirmojnë se ul rrezikun nga demenca
Shkencëtarët më në fund u kanë dhënë njerëzve dritën jeshile për të ngrënë më shumë, ata që e duan djathin me yndyrë sepse me ngrënien e disa fetave në ditë e ndihmojnë trurin e tyre t’i rezistojë rënies së shëndetit që lidhet me moshën.
Sipas nutricionistëve në Universitetin e Lundit në Suedi, e njëjta gjë vlen edhe për ata që adhurojnë ëmbëlsirat dhe shijojnë kremin me një fetë byreku ose një grusht luleshtrydhe.
Ulje e rrezikut prej 13% dhe 16%
Studiuesit zbuluan se njerëzit që hanin të paktën 50 gramë djathë me shumë yndyrë në ditë ulin rrezikun e zhvillimit të demencës me 13 për qind, ndërsa konsumimi i 20 gramëve ose më shumë të ajkës në ditë shoqërohet me një ulje prej 16 për qind të rrezikut të zhvillimit të demencës.
Djathërat me pak yndyrë nuk kanë një efekt të tillë në demencë, konstatoi ekipi i Lundit, i cili gjithashtu nuk gjeti “asnjë lidhje” me produkte të tjera të qumështit si qumështi, gjalpi ose kosi.
“Ka pasur një debat për dekada të tëra rreth dietave të produkteve me yndyrë të lartë kundrejt atyre me pak yndyrë, duke e kategorizuar ndonjëherë djathin si një ushqim të pashëndetshëm që duhet të kufizohet,” tha Emily Sonestedt, puna e së cilës së bashku me ekipin u botua në dhjetor nga Akademia Amerikane e Neurologjisë.
Djathërat me të paktën 20% yndyrë, ajka mbi 30% yndyrë
Djathërat me shumë yndyrë janë ato që përmbajnë të paktën 20 për qind yndyrë, ndërsa çdo version i ajkës nën 30 për qind konsiderohet me pak yndyrë.
Ekipi studioi historitë shëndetësore të gati 28.000 suedezëve gjatë një çerek shekulli, nga të cilët 3.208 zhvilluan demencë gjatë asaj kohe. Pjesëmarrësit monitoruan se çfarë hanin dhe si i përgatitnin vaktet e tyre, dhe më pas ua dhanë këtë informacion shkencëtarëve.
“Studimi ynë zbuloi se disa produkte qumështi me shumë yndyrë mund të zvogëlojnë në të vërtetë rrezikun e demencës, duke sfiduar disa supozime prej kohësh në lidhje me shëndetin e yndyrës dhe trurit,” shtoi Emily Sonestedt, duke bërë thirrje për më shumë kërkime mbi këtë temë, veçanërisht në vende si Shtetet e Bashkuara, ku djathi shpesh hahet i shkrirë dhe me mish.
Megjithatë, ekipi theksoi se përfitimet e vëzhguara nuk vlejnë për njerëzit që kanë variantin e gjenit APOE e4, i cili është dëshmuar se është një “faktor rreziku gjenetik për sëmundjen e Alzheimerit”.
