A po shkon Rama i vetëm drejt zgjedhjeve të parakohshme?

Kryeministri Edi Rama duket se ka intensifikuar takimet në të gjithë vendin, duke e kamufluar proçesin në atë që e cilëson si llogaridhënia e qeverisë me qytetarët. Por formatet me të cilat Rama dhe stafi i tij, përfshi edhe deputetët e ministrat, kanë zgjedhur është i njëjtë pothuajse, madje edhe me detaje, me fushatat elektorale.

Qytetarëve vijohet t´i premtohet dhe nuk thuhet sepse nuk janë realizuar premtimet e mëparshme.

Flitet se çdo të bëhet në të ardhmen, por nuk thuhet se ç´po bëhet me të tashmen, i kërkohet deputetëve të jenë prezent sa më shumë në zonat e tyre dhe qytetarëve të bashkëpunojnë përmes një portali për të shprehur shqetësimet.

Në takime marrin pjesë pothuajse mbështetës të Qeverisë, madje edhe ata që shprehin apo artikulojnë një problematikë apo pakënaqësi, thjesht përdoren për të krijuar idenë në opinion të takimeve të hapura. Në fakt ajo që po ndodh ditë pas dite dhe javë pas jave më tepër është vënia në punë e një mekanizmi për të mbajtur të karikuar strukturat, deputetët dhe mbështetësit e tij.

Sot në zyrat e qeverisë dhe Partisë Socialiste flitet për sondazhe, që kanë nisur pak javë më parë dhe që zhvillohen pothuajse 1 vit nga mbajtja e zgjedhjeve të fundit parlamentare. Gjithçka mbahet sekret, askush nuk jep të dhëna, ndërsa është atashuar një prej organizatave, një pjesë e stafit të së cilës është inkuadruar në stafin e Kryeministrisë.

Pavarësisht deklaratave publike se nuk ka zgjedhje të parakohshme dhe se qeveria do të përmbushë mandatin e saj, apo numrit të votave që sot ka Qeveria në Kuvend, ajo çka mund të lexohet përtej publikes, është që Rama nuk ndihet i qetë, nuk ndihet komod dhe nuk mund të mbajë përgjegjësinë i vetëm për çdo vendimmarrje që mund t´i imponohet nga faktorë të ndryshëm.

Më 28-29 qershor, BE do të japë vendimin e saj për hapjen ose jo të negociatave me Shqipërinë, dhe shanset për një përgjigje pozitive janë minimale, për të mos thënë që janë zero. Kjo edhe për shkak se vendimi duhet të jetë unanim dhe qoftë edhe 1 vend i BE-së të mos votojë pro, atëherë gjithçka ndalet.

Në një përgjigje negative, Rama e ka të qartë se lëvizja e opozitës nuk do të jetë e njëjtë me atë që është përballur deri më sot. Kjo të paktën është pohuar publikisht edhe prej vetë opozitës, ndërsa protestat e pandalshme, mund të nisin nga shtatori me një kërkesë të vetme, largimin e qeverisë.

Po kështu presioni në rritje për hetimin e atyre që quhen “peshqit e mëdhenj” mund të jetë një ngarkesë që s´mund të përballohet nga Kryeministri, aq më tepër kur mund të përballet me kërkesa që kanë të bëjnë me të besuarit e tij në qeveri. Në një rast ai pengoi kërkesën për ish-ministrin e Brendshëm, që konsiderohej një prej bashkëpunëtorëve më të afërt, por kjo pati një kosto, e cila nëse përsëritet kalon përtej pozicionit të tij.

Përballë një situate të tillë dhe skandaleve të mundshme që mund të publikohen, ku flitet se janë të përfshirë anëtarë të kabinetit qeveritar, duket se Rama do të tentojë të çojë vendin drejt zgjedhjeve të parakohshme.
Kundrejt presioneve në rritje, duket se Rama, i vetëm ka ndezur motorët e fushatës, duke mbajtur në presion të tijët, por edhe duke testuar se si mund të minimizojë kostot e përgjegjësive.

Por pengesat e vetme për të duket se janë, reforma zgjedhore dhe ajo në drejtësi. Rama e ka të qartë se pa përfunduar reformën zgjedhore, opozita e sotme nuk i hyn në zgjedhje, sikundër e ka të qartë se ndërkombëtarët e investuar fort në reformën në drejtësi, do të insistojnë që së paku të marrin jetë institucionet më të larta të gjyqësorit, por edhe SPAK, prokuroria special që do të hetojë zyrtarët e lartë dhe korrupsionin qeveritar.

Dhe mënyra sesi mund të zgjidhet kjo situatë mbetet për tu parë…