AAK: Anulohet takimi me Hotin; Zyra e Kryeministrit: S’ishte parashikuar takimi!

Takimi i partnerëve të koalicionit qeverisës i paralajmëruar për sot nga Aleanca për Ardhmërinë e Kosovës, AAK, është anuluar. Kështu thonë sot nga AAK, duke shtuar se takimi pritet të mbahet të hënën.

Por Zyra e kryeministrit të Kosovës për Telegraf ka sqaruar se në axhendë të Kryeministrit Avdullah Hoti nuk ka pasur fare takim mes liderëve të partive të koalicionit qeverisës.

“Nëse ka informacione të reja do t’ju informojmë,” është shprehur Xhavit Beqiri nga Zyra e kryeministrit.

Ndryshe, takimi i partnerëve të koalicionit qeverisës ishte paralajmëruar një ditë më parë përmes një njoftimi nga Aleanca për Ardhmërinë e Kosovës.

“Ju njoftojmë se kryetari i Aleancës për Ardhmërinë e Kosovës, Ramush Haradinaj, do të marrë pjesë nesër (e enjte), në takimin që do mbahet në ndërtesën e qeverisë, së bashku me liderët e tjerë të koalicionit dhe kryeministrin Avdullah Hoti.”