Abdurahmën, bir’ i dashur,

nga Ismet Toto

Më bëhet shumë qejfi kur shohë se javash-javash vjen në rrugën e mirë dhe nuk do t’më mundosh të të japë për ditë këshilla. Ca më tepër gëzohem kur shohë se hoqe dorë nga ajo luftë të ashpër që kishe hapur kundra Mehdi beut dhe ke filluar t’i mprosh projektet e tij.

Unë tashti e di fare mirë se me ç’thikë do t’a rrjepësh Mehdi beun, sikur të të bjerë në dorë, por nejse kështu vepro, lavdëroje, bërja qejfin gjer sa t’a kapësh! Pastaj të them unë, me gjithë që ti e di vetë punën t’ënde…

Po shiko mirë se mos bësh përsëri atë gabim që bëre sefte duke thënë se Mehdi beu shkel statutin e të tjera… Ç’të duhet ty, or’ shpirt i babës, t’u kujtosh shqipëtarëve statute dhe ligja? Mos i trazo ato, leri më mirë, pse mund të dalë ndonjë të të thotë se në kohën tënde ata kishin vleftë për të tjerët dhe jo për ty, ose të të thonë se ti këtë zhurmë e bën për xhurnalizëm dhe ku e di unë…

Tashti të kam dhe një këshillë tjetër: Shiko, lavdëroje pak atë Etemin dhe përpiqu se mos e ujdisësh me atë, pse mos na sjell ndonjë ngatërresë n’ato dreq listash. E di ti si t’a rregullosh punën… Si ç’ke bërë në Stamboll me Xhon-Turqët dhe pastaj me Kemalistët. Tregohu i mirë me të gjithë gjer sa të fitosh davanë, pastaj Allah qerim! Nuk shikon Zotin tënd, që asnjeriut s’i a prish qejfin?

Kështu, m’u bëfsh kurban, or’ shpirt’ i babës, kështu vepro. S’do me thënë gjë të lëvdosh një që shaje dje kur e kërkon puna. Ç’dreq vetëm m’atë kopshtëzën e vogël – 72 dynymesh – në Laprakë do mbetesh dhe me një pallat në rrugën e Saraçëve në Tiranë? Të duhen dhe disa pallate në Zvicër, or’bir!

Dhe ato s’bëhen kollaj. Po mos dolle në listë, si do bëhesh deputet dhe Ministër Dhe po mos u bëre deputet dhe Ministër, si do bëhen pallatet? Me një rrogë vetëm këta s’bëhen. A po s’e mban mënd katandinë tënde kur ishe turk nëpunës në Stamboll?/Arbënia, 21 gusht 1936/