Abrashi: Vetëvendosje nuk po e mbështet Vendimin e Qeverisë Kurti!

Deputeti i AAK-së, Gazmend Abrashi, ka akuzuar Lëvizjen Vetëvendosje se nuk po e mbështet zbatimin e vendimit të Qeverisë Kurti për t’i paguar punëtorët e sektorit privat me nga 170 euro.

Sot në seancën plenare të Parlamentit të Kosovës, Gazmend Abrashi tha se sektori civil i ka marrë pagat dhe të ardhurat e veta, madje edhe një javë më parë, derisa sektori privat ka qenë 80 për qind i bllokuar dhe i është pamundësuar çfarëdo aktiviteti ekonomik gjatë kësaj pandemie. 

“Mos ndjellni populizëm se jeni konfliktuoz. Nëse ju e keni planifikuar dhe e keni dhënë pakon ekonomike për të ndihmuar sektorin privat, nuk po e kuptoj çfarë problemi keni tash për të njëjtën pako, të cilën nuk keni mundur ta implementoni sa keni qenë në qeveri, e qeveria aktuale po dëshiron ta implementojë ashtu sikur e keni dashur, çfarë problemi keni për ta implementuar. Kini parasysh se populli dhe sektori privat që po ju përcjell sot, e mban në mend se pakon që e keni propozuar, nuk po e lejoni të implementohet. Mos harroni që rrogat sot deputetët e Parlamentit të Kosovës i marrin prej sektorit privat,” tha deputeti dhe biznesmeni i njohur Gazmend Abrashi duke shtuar se Qeveria ka paguar vetëm 80% të aplikantëve për muajin mars, ndërsa për muajin prill nuk ka bërë asnjë pagesë të vetme ndërsa përfundoi: 

“Qeveria paraprake përkundër asaj që ka proklamuar 180 milionë pakon, diku vetëm 80% të pagave të muajit mars i ka paguar derisa pagat e muajit prill as që kanë filluar të paguhen dhe ideja e pagesës së 50 për qind e qirave të biznesit privat ende nuk ka filluar. Dje kam kuptuar që nuk ka mjete dhe Ministria e Financave dje ka ardhur me propozim për implementimin e projekt-propozimit të Qeverisë Kurti. Nuk i kuptoj deputetët e Vetëvendosje që një projekt që e kanë propozuar vetë, tash nuk e përkrahin.”