Abuzimi me konkurrencën, ja tregjet që po monitorohen…

Autoriteti i Konkurrencës ka në proces monitorimi për abuzim me pozitën dominuese të paktën tetë tregje, të cilat përfshijnë që nga fluturimet ajrore, tregjet financiare dhe deri te shitjet me pakicë të ushqimeve.

Në një raport të posaçëm për Parlamentin e Shqipërisë, Autoriteti i Konkurrencës njoftoi se procesi i monitorimit për disa nga këto tregje ka nisur që në vitin 2018 dhe do të vijojë edhe në vitin 2019.

Shërbimet celulare janë në fokus monitorimi të vazhdueshëm, për shkak të tendencës për abuzim pas transferimit të ndërmarrjes Plus Communication SHA tek Vodafone Albania SHA dhe Telekom Albania SHA.

Gjithashtu nën monitorim për abuzim me pozitën dominuese është edhe i gjithë zinxhiri i gazit të lëngshëm që nga importi, magazinimi dhe tregtimi me pakicë. Tregu i shfaqjes së filmave në Tiranë po monitorohet pas ankesave për pozitë dominuese nga Cineplex. Pozita dominuese në kartonin jeshil është duke u monitoruar në bashkëpunim me Autoritetin e Mbikëqyrjes Financiare. Monitorimi do të vijojë për të gjithë periudhën e përjashtimit nga ndalimi të marrëveshjes, konkretisht deri në muajin shkurt të vitit 2020.

Gjithashtu në monitorim këtë vit janë shërbimet financiare nga institucionet e mikrokredisë dhe tregu privat i shërbimeve spitalore.

Tregu i shitjes me pakicë të shërbimeve celulare

Komisioni i Konkurrencës ka vendosur dhe monitorimin e tregut me pakicë të shërbimeve celulare për një periudhë 1 (një) vjeçare, nga data 1 tetor 2017 – 1 tetor 2018.

Gjithashtu, pas marrjes së vendimit të AKEP nr. 20, datë 13.11.2017 “Për dhënien paraprakisht të miratimit për transferimin e së drejtës së përdorimit të frekuencave të sipërmarrësit Plus Communication SHA tek sipërmarrësit Telekom Albania SHA dhe Vodafone Albania SHA”, KK me vendimet nr. 484 dhe 485, datë 23.11.2017 “Për autorizimin e përqendrimit të realizuar nëpërmjet transferimit të ½ të spektrit të ndërmarrjes Plus Communication SHA tek Vodafone Albania SHA dhe Telekom Albania SHA, vendosi të autorizojë këto përqendrime, si dhe kryerjen e vlerësimit të tregut pas përqendrimit mbështetur në analizën e AKEP.

Për sa më sipër, AK ka monitoruar tregun me pakicë të shërbimeve celulare duke vlerësuar ndryshimin e strukturës së tregut pas përqendrimit, zbatimin e rekomandimeve të dhëna AKEP-it, KMK, dhe kompanive celulare; sjelljen e ndërmarrjeve lidhur me tarifat e vendosura në paketa, si dhe ka bashkëpunuar me AKEP për vlerësimin e dokumenteve të nxjerra për këshillim publik. Gjatë periudhës së monitorimit, ndërmarrjet kanë njoftuar pranë AK, lidhur me ndryshimin e tarifave të paketave që ata aplikojnë në zbatim të VKK nr. 475, datë 21.09.2017. KK ka dhënë disa rekomandime, të cilat duhet të merren në konsideratë nga AKEP gjatë analizës dhe vendimmarrjes së tij.

AK do të vazhdojë monitorimin e këtij tregu edhe për një periudhë 3-mujore.

Zinxhiri i gazit të lëngshëm

Komisioni i Konkurrencës në tetor të vitit 2017 vendosi “Për mbylljen e hetimit të thelluar në të gjitha segmentet e tregut të importit, depozitimit, shitjes me shumicë, shpërndarjes dhe shitjes me pakicë të produktit gaz i lëngshëm për konsum familjar dhe biznes” për një periudhë 1 (një) vjeçare nga 16.10.2017 deri në 16.10.2018.

Nga monitorimi janë vlerësuar strukturat e tregut përkatës, nga ku rezulton se ka një ndërmarrje të re hyrëse në këtë treg, e cila ka fituar një pjesë të konsiderueshme tregu. Gjithashtu, ndërmarrjet importuese dhe shitëse me shumicë aplikojnë çmime të ndryshme shitje nga njëra-tjetra me diferenca të dukshme, por që reflektojnë trendin e bursës PLATZ.

Për sa më sipër, tregu i importit dhe shitjes me shumicë të GLN-së për ngrohje dhe konsum familjar do të mbahet në monitorim edhe për një periudhë 6-mujore për vitin 2019, duke qenë se tregu ka ndryshuar strukturën.

Tregu i shfaqjes së filmave në kinema në qytetin e Tiranës

Monitorimi i tregut të shfaqjes së filmave në kinema në qytetin e Tiranës vijon në zbatim të VKK nr. 479, datë 26.10.2017 “Për mbylljen e hetimit paraprak në tregun e shfaqjes së filmave në kinema në qytetin e Tiranës”.

Gjatë monitorimit janë analizuar kushtet e tregut për zhvillimin e konkurrencës së lirë dhe efektive në këtë treg, është realizuar vlerësimi i sjelljes së ndërmarrjes me pozitë dominuese “Cineplexx” SHPK dhe nuk kanë rezultuar shenja të kufizimit të konkurrencës nga kjo ndërmarrje, por sjellja e saj do të vlerësohet në vijimësi nga AK. Periudha e monitorimit është periodike çdo 6-muaj brenda 10 prill dhe 10 tetor të çdo viti.

Tregu i sigurimeve për produktin Kartoni Jeshil

Autoriteti i Konkurrencës ka monitoruar tregun e sigurimeve për produktin Kartoni Jeshil në zbatim të VKK nr. 499, datë 15.02.2018 “Për përjashtimin nga ndalimi të marrëveshjes së lidhur midis shoqërive të sigurimit për Kartonin Jeshil” për një periudhë dyvjeçare. Për realizimin e këtij monitorimi, i cili është në proces, AK ka bashkëpunuar me AMF, BSHS dhe ndërmarrjet e sigurimit, duke kërkuar informacion për zbatimin e VKK nr. 499, datë 15.02.2018 dhe rritjen e konkurrencës në këtë sektor. Monitorimi do të vijojë për të gjithë periudhën e përjashtimit nga ndalimi të marrëveshjes, konkretisht deri në muajin shkurt të vitit 2020.

Tregu i transportit ajror, ndërmarrja Austrian Airlines

Autoriteti i Konkurrencës është duke monitoruar sjelljen e ndërmarrjes Austrian Airlines që operon në tregun e transportit ajror, në zbatim të VKK nr. 525, datë 14.06.2018 “Për mbylljen e hetimit paraprak në tregun e transportit ajror të pasagjerëve ndaj ndërmarrjes Austrian Airlines dhe dhënien e disa rekomandimeve”, e cila do të vazhdojë monitorimin për një periudhë 1-vjeçare, konkretisht deri në muajin qershor 2019.

Tregu i shërbimeve të subjekteve financiare jobankë

Komisioni i Konkurrencës, me vendimin nr. 537, datë 20.07.2018 “Mbi autorizimin e përqendrimit të realizuar nëpërmjet shitjes dhe transferimit të aksioneve të BFSE HOLDING B.V tek shoqëria AMRYTA CAPITAL LLP”, vendosi që tregu i kredisë, mikrokredisë, qirasë financiare dhe faktoringut, të ofruara nga SFJB-të, të jetë objekt monitorimi për një periudhë prej 1 viti nga data e shpalljes së vendimit. Monitorimi ka për qëllim vlerësimin e sjelljes së subjekteve në lidhje me interesat e kredive të ofruara, në të gjitha format, komisionet e aplikuara për shërbimet, si dhe fleksibilitetin e lëvizshmërisë së klientëve mes ofruesve të shërbimit.

Tregu do të vazhdojë të jetë në monitorim deri në muajin korrik 2019.

Tregu i shërbimeve spitalore

KK, me vendimin nr.539, datë 24.7.2018 “Mbi ndryshimin e kontrollit të shoqërisë Hygeia”
“Hospital Tirana SHA nga Diagnostic and Therapeutic Centre of Athens, Hygeia S.A tek American 21 Hospital SHA” vendosi monitorimin për spitalin American Hospital SHA, për një periudhë 1-vjeçare 24.07.2018 deri në 24.07.2019.

Në kuadër të një studimi të realizuar në tregun e shërbimeve spitalore, ky monitorim do të jetë pjesë e hetimit të përgjithshëm të hapur në këtë treg me vendimin nr. 552, datë 04.10.2018 “Për hapjen e procedurës së hetimit të përgjithshëm në tregun e shërbimit spitalor”.