Acarohet me takimet e Bashës, Rama: I ftoj të gjithë shqiptarët të mos jenë tolerantë…
Gjithçka që ka në jetë e arriti me mitingje, ulërimë dhe ndotje sot akustike por kjo nuk e pengon Kryeministrin Edi Rama që sot të akuzoj Kryetarin e PD, Lulzim Basha, për takimet elektorale që zhvilloi në disa qytete ndërsa i referohet pandemisë duke ftuar të gjithë shqiptarët të mos jenë tolerantë në opinionin e tyre në raport me këto shfaqje. Nga Fieri ai sot ka paralajmëruar masa të rrepta duke akuzuar opozitën për këtë vendim sepse, sipas tij, ai nuk do që të ndëshkohet ekonomia.
“Të mos ushqehemi me iluzionin se duke mbledhur ato tufa me dy gishta marrin ndonjë votë më shumë. Është komplet absurde dhe realisht dëm i madh. Paralelisht me vaksinimin, rregullat duhet të respektohen dhe çdokush duhet të shtrëngojë veten në raport me ato masa që janë të thjeshta, por nuk duhen shkelur. Ne nuk kemi preferuar që ta shtrëngojmë ekonominë, të shtrëngojmë mundëisnë për punë të të gjithë njerëzve, por ama nga ana tjetër kjo nuk duhet të thotë që njerëzit të lëshohen përtej nevojave të punës, përtej nevojave të jetës së përditshme në situata që faktikisht bëjnë të kundërtën e vaksinës, bëjnë të kundërtën e përpjekjes së përbashkët. Unë besoj që ne duhet realisht që të marrim një vendim shumë të qartë të gjithë bashkë. Ne e kemi marrë si PS, por duhet ta marrim të gjithë bashkë,” tha Edi Rama nga Fieri duke bërë sikur fle gjumë me Kushtetutë në dorë ndonëse shquhet vetëm për paligjshmëri:
“Nëse është nevoja për të zgjeruar më shumë se sa një numër i kufizuar njerëzish që mund të grumbullohen së bashku, këtë nevojë do ta adresojmë së bashku dhe do ta adresojmë duke iu drejtuar autoriteteve. Nuk më takon mua dhe nuk na takon ne ta bëjmë të vetëm këtë gjë pasi ne nuk e kemi problem, mund të shkojmë deri më 25 prill me 10 veta në çdo event dhe na mjafton të mbajmë distancat dhe kaq. Por nëse është e nevojshme mund t’i drejtohemi autoriteteve, por nuk mund dot të vazhdohet kështu.”
Dhe, në fund u kthye në identitet, dhe ashtu siç është vetë jotolerant i fton të gjithë shqiptarët që të jenë të tillë:
“Unë i ftoj të gjithë shqiptarët të mos jenë tolerantë në opinionin e tyre në raport me këto shfaqje që të kujtojnë ato mitingjet pa shije të viteve ‘90. Hip mbi makina, mblidh njerëz me dy gishta, grumbullohu me flamuj deri dhe në një festë si ajo në Elbasan. Vër ulërimën, krijo kot ndotje akustike në mes të qytetit, madje në mes të një feste dhe pastaj bëj dhe viktimën sikur u sulmove, ndërkohë që qëndron aty si një provokator i njerëzve pa dallim dhe me montazhe skuthash krijon komplet idera të gabuara mbi atë që në fakt ka ndodhur dhe që nuk kishte lidhje as me mua as me ne që ishim aty, por ishte rezultati i mungesës së plotë të përgjegjshmërisë. Provokime, acarime, tensionime krejt të panevojshme”, deklaroi Rama.
